Almaty qalasynyń burynǵy ákimi Baqytjan Saǵyntaev qala turǵyndaryna Facebook paraqshasynda úndeý jasady, dep habarlaıdy «Adyrna» tilshisi.
«Qurmetti almatylyqtar! Búgin men óz laýazymymdy jańa ákimge tapsyramyn. Osydan týra 720 kún buryn Prezıdent maǵan Almaty ákimdigin basqarýdy senip tapsyrdy. Bul úshin Memleket basshysyna rızamyn.
Men sizdermen únemi birge boldym. Qala ómirin jaqsartýǵa bar kúsh-jigerimdi arnadym.
Uzaq merzimdi «Almaty-2050» strategııasyn qabyldap, qalany damytýdyń keleshegin aıqyndadyq. Prezıdenttiń «Shetsiz qala» qaǵıdaty negizinde qalaǵa qosylǵan aýdandardyń túıtkildi máselelerin sheshýge basa nazar aýdaryp, «Jańa Almaty» keshendi baǵdarlamasyn qabyldadyq.
Biz áleýmettik máselelerdi sheshý úshin Almatyny aglomeraııa retinde damytý jáne oblystyń qalamen shektesetin 4 aýdanynda jumys oryndaryn qurý jumysyn kún tártibine qoıdyq.
Densaýlyq saqtaý júıesi nyǵaıtyldy. Bir jyldyń ishinde eń zamanaýı jabdyqtarmen jabdyqtalǵan 3 juqpaly aýrýlar aýrýhanasyn iske qostyq. Pandemııa kezinde densaýlyq saqtaý júıesindegi daǵdarysqa jol berilmedi.
Mektepterdi jedel salý baǵdarlamasyn qolǵa aldyq. Tek 2021 jyly 33 jańa mektep salyndy. Bul – mektepterdegi oryn tapshylyǵyn azaıtýǵa baǵyttalǵan túbegeıli qadam boldy»,– dedi ol.
Sondaı-aq Saǵyntaev barsha almatylyqqa alǵysyn aıtty.
«Meniń árbir jumys kúnim sizderdiń kóz aldylaryńyzda ótti. Ózderińizben árdaıym kezdesip, aqyldasyp otyrdyq. Apta saıyn Akimat Live tikeleı efırine shyqtym. Atqarylǵan sharalar týraly únemi habardar boldyńyzdar. Birge atqarylǵan jumys úshin almatylyqtarǵa alǵys aıtamyn!
Qalamyzǵa jáne barsha almatylyqtarǵa baqytty ǵumyr tileımin! Almaty máńgi meniń júregimde»,– dedi ol.
