Almaty qalasynyŋ būrynǧy äkımı Baqytjan Saǧyntaev qala tūrǧyndaryna Facebook paraqşasynda ündeu jasady, dep habarlaidy «Adyrna» tılşısı.
«Qūrmettı almatylyqtar! Bügın men öz lauazymymdy jaŋa äkımge tapsyramyn. Osydan tura 720 kün būryn Prezident maǧan Almaty äkımdıgın basqarudy senıp tapsyrdy. Būl üşın Memleket basşysyna rizamyn. Men sızdermen ünemı bırge boldym. Qala ömırın jaqsartuǧa bar küş-jıgerımdı arnadym. Ūzaq merzımdı «Almaty-2050» strategiiasyn qabyldap, qalany damytudyŋ keleşegın aiqyndadyq. Prezidenttıŋ «Şetsız qala» qaǧidaty negızınde qalaǧa qosylǧan audandardyŋ tüitkıldı mäselelerın şeşuge basa nazar audaryp, «Jaŋa Almaty» keşendı baǧdarlamasyn qabyldadyq. Bız äleumettık mäselelerdı şeşu üşın Almatyny aglomerasiia retınde damytu jäne oblystyŋ qalamen şektesetın 4 audanynda jūmys oryndaryn qūru jūmysyn kün tärtıbıne qoidyq. Densaulyq saqtau jüiesı nyǧaityldy. Bır jyldyŋ ışınde eŋ zamanaui jabdyqtarmen jabdyqtalǧan 3 jūqpaly aurular auruhanasyn ıske qostyq. Pandemiia kezınde densaulyq saqtau jüiesındegı daǧdarysqa jol berılmedı. Mektepterdı jedel salu baǧdarlamasyn qolǧa aldyq. Tek 2021 jyly 33 jaŋa mektep salyndy. Būl – mektepterdegı oryn tapşylyǧyn azaituǧa baǧyttalǧan tübegeilı qadam boldy»,– dedı ol.Sondai-aq Saǧyntaev barşa almatylyqqa alǧysyn aitty.
«Menıŋ ärbır jūmys künım sızderdıŋ köz aldylaryŋyzda öttı. Özderıŋızben ärdaiym kezdesıp, aqyldasyp otyrdyq. Apta saiyn Akimat Live tıkelei efirıne şyqtym. Atqarylǧan şaralar turaly ünemı habardar boldyŋyzdar. Bırge atqarylǧan jūmys üşın almatylyqtarǧa alǧys aitamyn! Qalamyzǧa jäne barşa almatylyqtarǧa baqytty ǧūmyr tıleimın! Almaty mäŋgı menıŋ jüregımde»,– dedı ol.
