Äskerden esınen aljasyp oralǧan 19 jastaǧy Renat Jetkergenovtıŋ jaǧdaiy oŋaldy. Ol Qyzylorda psihialyq-densaulyq ortalyǧynan emdelıp şyǧyp, qazırgı taŋda esın jinaǧan, dep habarlaidy “Adyrna” ūlttyq portaly.
Orda.kz mälımetınşe, Renat ortalyqtan şyqqannan keiın alǧaş ret ata-anasyn tanyǧan. Anasy Aiǧanym Izbasarova ūlynyŋ dertı qaita kele me dep, oǧan artyq sūraq qoimaitynyn jasyrmady.
«Auruhanadan şyqqanyna 5 kün boldy. Auru küşeiıp kete me dep odan eşteŋe sūramaimyz, mazalaudan qorqamyz. Därı-därmegın beremız. Basynan ötken sūmdyqty eske tüsırmeuge tyrysamyz» dedı Renattyŋ anasy Aiǧanym.
Renattyŋ jaǧdaiyna qatysty qylmystyq ıs qozǧalǧan. Endı ol saraptamalardan ötuı kerek.
«Renatqa sot tergeuı aiasynda bırqatar saraptama taǧaiyndaldy, bırı Almatyda ötedı. Ol üşın Renat Jetkergenovtı Qyzylordadan Almatyǧa alyp baru qajet. Bıraq oǧan 500 myŋ teŋge kerek. Būǧan jol jüru, Almatyda tūru, tamaq kıredı. Ata-anasynda mūndai aqşa joq» deidı Jetkergenovtar otbasynyŋ advokaty Nūrjamal Baianova.
19 jastaǧy jıgıttıŋ ata-anasy saraptama şyǧynyn kınälı tarap öz moinyna alsa dep niet bıldırdı.
«Otbasymyzda ne bolǧanyn, qandai qiyn jaǧdaida tap bolǧanymyzdy bärı bıledı. 3-4 ai boiy aqysyz demalystamyn, mektepte mūǧalım bolyp jūmys ısteimın. Küieuım jūmyssyz. Şynymdy aitsam, Araldan Qyzylordaǧa baru üşın köp qarajat kettı. Renat auruhanada jatqan oblys ortalyǧynda tūru da qymbat boldy. Sondyqtan saraptamaǧa baru üşın ūlym boryşyn ötegen 25744 äskeri bölımı şyǧyndy öteuı kerek. Sol jerde ol osy jaraqattardy aldy» dedı Aiǧanym Izbasarova.
Otbasynyŋ advokaty Baianova osyndai ūsynys boiynşa QR Qaruly Küşterı Bas ştabynyŋ bastyǧy Marat Qūsaiynovtyŋ qabyldauyna jazylǧan.
Eske salsaq, 19 jastaǧy Renat äskerge baryp, Otan aldyndaǧy boryşyn ötep kelgennen keiın ata-anasyn tanymai qalǧan.
“Adyrna” ūlttyq portaly
