Bügın Mäjılıstıŋ jalpy otyrysynda deputat Edıl Jaŋbyrşin «Jaŋa Qazaqstan» atty deputattyq top qūrylatynyn jariia ettı, dep habarlaidy QazAqparat.
Qaŋtar aiynyŋ basynda elımız būryn soŋdy bolmaǧan qiyn jaǧdaidy basynan ötkızdı.
Qazaqstanǧa qastyq oilaǧan ışkı jäne syrtqy jaular memleketımızdıŋ şaŋyraǧyn şaiqap, keregesın sökkılerı keldı. Opasyz ekstremistık toptardyŋ äreketınen bauyrlarymyzdyŋ qany tögıldı, azamattarymyz auyr jaraqattar aldy, memlekettık jäne käsıpkerlerık nysandarǧa jäne mülıkterge nūqsan keldı.
Halyqtyŋ sabyrlyǧy men auyzbırşılıgınıŋ, Prezidentımız Qasym-Jomart Kemelūly Toqaevtyŋ tabandylyǧy, qaisarlyǧy jäne Respublikaǧa, Konstitusiialyq qūrylymǧa qarumen qarsy şyqqan sodyrlar men banditterdı joiu jönındegı jauapty şeşımınıŋ arqasynda, memlekettıŋ egemendıgı jäne tūraqtylyǧy saqtalyp qaldy.
Būl jaǧdai kezdeisoq bolǧan joq. Elımızde köpten berı qordalanyp, ädıletsızdık pen jemqorlyqtyŋ kesırınen şeşımın tappaǧan äleumettık-ekonomikalyq mäseleler oqiǧanyŋ tūtanuyna sebepşı boldy», - dep toqtaldy E. Jaŋbyrşin.
Osy oraida ol qaŋtar oqiǧasy bärımız üşın ülken sabaq boluy kerek ekenın atap öttı. Onyŋ alǧyşarttary – qoǧam men bilıktıŋ şynaiy tazaruy, aqiqattyŋ aşyq aityluy, qatelıkterdıŋ moiyndaluy, memlekettık apparat pen qūrylymdardyŋ oligopoliia ökılderı men jemqorlardan tazartyluy bolyp otyr.
«Būny, bügın qoǧam belsendı talqylap jäne ony Memleket basşysy batyl türde ıske asyra bastady. Prezidentımızdıŋ Qazaqstandy jaŋartamyn, dūrys arnaǧa būramyn degen aq nietı bar. Al, bız, el bolyp ony bırauyzdan qoldauymyz qajet!Özderıŋızge mälım qaŋtardyŋ 11 jūldyzynda Prezident Parlament Mäjılısınıŋ jäne keşegı Ükımettıŋ otyrysynda elımızde atqarylatyn bıraz maŋyzdy mäselelerdı aiqyndap, naqty mındetterdı qoidy. Jalpy qoǧam men memleket arasyndaǧy qarym-qatynasta transformasiianyŋ qajettılıgı tuyndaǧanyn jäne «Jaŋa Qazaqstandy» qūru turaly Qasym-Jomart Kemelūly qaita-qaita aityp jür. Mūndai keşendı transformasiia eŋ aldymen Parlament qyzmetınde oryn alyp, Mäjılıs qabyrǧasynan bastaluy şart!», - dedı deputat.
«Sondyqtan Parlamenttıŋ tömengı palatasyndaǧy jūmystardy jaŋa deŋgeige köterıp jäne Prezidenttıŋ tapsyrmalaryn Mäjılıs deputattary tarapynan qadaǧalau maqsatynda «Jaŋa Qazaqstan» atty deputattyq topty qūrudy, resmi türde jariialaimyz!«Jaŋa Qazaqstan» deputattyq toby qoǧamdaǧy eŋ özektı mäselelerdı der kezınde Parlament törınde köterıp, tūrǧyndardyŋ mūŋ-mūqtajdaryn uaqytynda şeşıuge qyzmet etedı. Ükımetpen bırlesıp halyqtyŋ ruhaniiatyn küşeitetın, äl-auqatyn jaqsartatyn zaŋ jobalaryn daiyndauǧa, sailauşylarymyzben odan ärı tyǧyz qarym-qatynastar ornatuǧa müddelı.
«Jaŋa Qazaqstan» deputattyq toptyŋ qoǧamdaǧy barlyq belsendı saiasi partiialarmen, narazy toptarmen, ükımettık emes ūiymdarmen jäne sarapşylarmen qoian-qoltyq qyzmet jasauǧa yntaly jäne daiyn ekenın mälım etemız. Qazaqta «Bırlesıp kötergen jük jeŋıl» - degen söz bar! Jaŋa Qazaqstannyŋ jügın ūlys bolyp bırge kötereiık! Prezident bastaǧan reformalardy sabotajǧa jıbermei, aiaǧyna deiın jetkızeiık! Barşaŋyzdy, eldıŋ ırgesın nyǧaituǧa şaqyramyz!», - dedı Edıl Jaŋbyrşin.Būl bastamaǧa Mäjılıstıŋ bırqatar deputaty qoldau bıldırgen.
”Adyrna” ūlttyq portaly
