QAŊTAR QANDY QYRǦYNY. QYRYQ KÜN
Qaŋtar qandy qyrǧynynan keiın bärımız de özgerdık dep jatyrmyz. Men de däl sondai küi keşıp jürmın: ne ūiqy joq, ne maza joq. Sanany nebır astyrtyn joramaldar jaulap alǧan. Eŋ bastysy, oqqa ūşqan jäne azaptalyp jatqan beibıt şeruşılerga qatysty aşy sūraqtarǧa jöndı jauap joq! Öleŋ de tua qoimady. "Almatyny tūman basty" dep bır öleŋ ǧana jaza aldym. Bar oiymdy maqalalar men sūhbattarda aityp jatyrmyn. Jyr qalamy bolsa, būl künderı qaŋtaruly küide qaldy... Sondyqtan bügın, Qandy qyrǧyn qūrbandarynyŋ qyrqy künı, osydan tura 10 jyl būryn, Jaŋaözen qandy tragediiasynan 40 kün ötkende jazǧan öleŋımdı jariialap otyrmyn. Ökınışke orai, tragediialar qaitalanuda! PS. Osy küngı mitingterge qatysty aitarym mynau. Qaŋtar qandy qyrǧyny beibıt şeruler men mitingılerdı bilık te, üşınşı küşter de özderınıŋ aram oilaryn jüzege asyryp, qūityrqy arandatularǧa bara alatynyn ap-anyq körsettı. Qanşama adam qyryldy, zardap şektı. Sol qauıptıŋ būlty älı de seiılgen joq! Bilık trazitı älı de aiaqtalǧan joq! Antitoqaevşyl küşter, keşegı zamanyn aŋsap, qaitarǧysy kelıp, kez kelgen sūmdyqqa baruy mümkın. Ol üşın beibıt adamdardy paidalanuy da mümkın! Maǧan bolsa, är qazaqtyŋ amandyǧy kerek! JAŊAÖZEN. QYRYQ KÜN Qyryq kün! Közım jasqa juylyp tūr, tūnyp tūr, Keregı joq nasihat pen ügıttıŋ! Saiasattan joly biık ärdaiym Qūrbandardy qadır tūtar ǧūryptyŋ! Qyryq kün! Qars airylǧan jüregımdı kım ūqtyŋ? Ei, Aqorda, nege sonşa qūnyqtyŋ? Qandy koldy qylmeskerdı tabuǧa Jetpeidı me saǧan, aitşy, qyryq kün?! Qyryq kün! Men şyndyq pen şerulerde şynyqtym, Kışıkpın men, kerek bolsa, ūlyqpyn. Elu jylyŋ ädıram bop qalsynşy, Eldı bügın jaŋartty ǧoi qyryq kün! Qyryq kün! Saǧan deiın beişara bop jürıppın, Jatqa syilap basyn maily jılıktıŋ! Qazaǧymnyŋ qanyn sorǧan sülık kım? Qazaǧymnyŋ qanyn tökken jülık kım? Qyryq kün! Men de sensız beimälım kün sürıppın Ortasynda bylyq penen şylyqtyŋ. Qazaqylyq degendı men qoldaimyn, Qūrsyn türı tek «qazaqbai-şylyqtyŋ»! Qyryq kün! Üzılmesın altyn jıbı ümıttıŋ! Künähardyŋ atyn atar bılıp kım? Jesır menen jer dauy bar qazaqta Qyryq künnıŋ artynda tūr qyryq qūn! Qyryq kün! Tötenşe bop töndı üstıŋnen qyryq tün. Sen degende ūiqymdy da ūmyttym. ÖZENIME bara almasam, mıgıtpın! ÖZENIME bara qalsam, jıgıtpın! Qyryq kün! Qylmyskerge tabady eken qūryq kım? Qaşan atar ÖZENIMDE külıp Kün? Qyryq künde közın aştyŋ qazaqtyŋ, Tanyttyŋ sen qasietın bır ūlttyŋ! Beket ata bätuasy qonsa eken, O, Qūdaiym, elge bostan berse eken! Adai malai emestıgın körsettıŋ, Qazaq mazaq emestıgın körsetem."Adyrna" ūlttyq portaly
