Qyrǵyzstan prezıdenti Sadyr Japarov qandaı da bir memleketti moıyndaý kez kelgen egemendi eldiń óz quqyǵy dep, Reseıdiń DHR men LHR-dy moıyndaýy týraly óz ustanymyn aıtty, - dep habarlaıdy “Adyrna” ulttyq portaly Sputnik agenttigine silteme jasap.
Onyń aıtýynsha, ol Ýkraınanyń shyǵysyndaǵy jaǵdaıdyń damýyn alańdaýshylyqpen baqylap otyr.
"Donbass tóńiregindegi jaǵdaıdy únemi baqylap otyramyn. Qyrǵyzstan BUU Qaýipsizdik Keńesiniń qoldaýyna ıe bolǵan qaqtyǵysty retteý jónindegi jalǵyz qujat, Mınsk ýaǵdalastyqtaryn saqtaý qajettiligin negizge alady. Ókinishke oraı, olardyń oryndalmaýy qazirgi qıyn jaǵdaıǵa ákeldi", - dep jazdy Japarov Facebook-te.
Ol jaǵdaı tek beıbit dıplomatııalyq jolmen sheshiletinine senim bildirdi.
"Adam ómiri - eń qundy nárse. Janjal odan ary ýshyǵyp ketpes úshin, jaǵdaıdy retteý kezinde barynsha saqtyq pen ustamdylyq tanytýǵa shaqyramyn. Múmkin, bul kóptegen Reseı azamattary turatyn Donbasstyń beıbit turǵyndaryn qorǵaý úshin qajet bolǵan shyǵar. Qandaı da bir memleketti moıyndaý kez kelgen eldiń egemendi quqyǵy ekenin atap ótkim keledi", - dep atap ótti Japarov.
“Adyrna” ulttyq portaly
