«QazMūnaiGaz» ūlttyq kompaniiasy mūnai-servistık ūiymdarynyŋ būrynǧy jūmyskerlerınıŋ «5/50» baǧdarlamasyna qatysqany boiynşa jasaǧan ündeulerıne tömendegını habarlaidy.
2017 jyldyŋ säuır aiynda «QazMūnaiGaz» ŪK AQ Basqarmasy «Oil Services Company» JŞS, «Oil Construction Company» JŞS, «Oil Transport Korporeişen» JŞS, «Mūnaitelekom» JŞS jäne «Maŋǧystauenergomūnai» JŞS mūnai-servistık käsıporyndarynda «Taraptardyŋ kelısımı boiynşa qyzmetkerlermen eŋbek şartyn merzımınen būzu turaly erejenı» («5/50» baǧdarlamasy) bekıttı.
Būl baǧdarlama aiasynda mūnai-servistık mekemelerdıŋ jūmyskerlerıne 5 jyldaǧy lauazymdyq eŋbekaqysynyŋ 50% mölşerınde qomaqty ötemaqy tölei otyryp, taraptardyŋ kelısımı boiynşa eŋbek şartyn būzu qarastyryldy.
Ereje talaptaryn tüsındıru maqsatynda jūmys toptary qūrylyp, eŋbek ūjymdarymen köşpelı kezdesuler ünemı ötkızılıp tūrdy.
Jūmyskerler «5/50» baǧdarlamasyna erıktı türde qatysqanyn atap ötken jön. Mysaly, Eŋbek şartyn būzu turaly kelısımnıŋ 1-tarmaǧynda «taraptar taraptardyŋ kelısımı boiynşa eŋbek şartyn būzu turaly ekıjaqty erıktı kelısımge keldı» delıngen. Sonymen qatar, ūsynystan bas tartqan jūmyskerler osy uaqytqa deiın QMG-nyŋ mūnai-servistık mekemelerınde jūmysyn jalǧastyryp jatqandyǧy būnyŋ taǧy bır dälelı bolyp tabylady.
Kelısım talaptaryna säikes jūmyskerlerdı QMG-nyŋ mūnai-servistık kompaniialarynyŋ ştatyna qaita qabyldau qarastyrylmady. Osylaişa, kompaniia 5 jyl ötkennen keiın jūmystan şyqqan jūmyskerlerdı qaita jūmysqa qabyldau turaly eşqandai mındetteme alǧan joq.
Būǧan qaramastan, osy jyldyŋ nauryz aiynyŋ 9-y künı būrynǧy jūmyskerlerdıŋ bır toby olarǧa 5 jylǧa tölengen aqşa qarajaty tausyldy degendı alǧa tartyp, Maŋǧystau oblysynyŋ äkımdıgıne olardy QMG-nyŋ mūnai servistık mekemelerıne qaita jūmysqa aludy talap etıp keldı.
Jinalǧandarmen Maŋǧystau oblysynyŋ äkımı Nūrlan Noǧaev jäne «QazMūnaiGaz» ŪK AQ Basqarma töraǧasynyŋ orynbasary Qūrmanǧazy Esqaziev kezdestı. Olar kezdesudıŋ qatysuşylaryna talaptarynyŋ zaŋsyz ekendıgın tüsındırıp, mäselenı sotqa jügınu arqyly zaŋ aiasynda şeşuge ūsynys berdı.
«5/50» baǧdarlamasyna «Maŋǧystaumūnaigaz» AQ mūnai-servistık mekemelerınen barlyǧy 3968 adam qatysty, olarǧa 43 mlrd 881 mln teŋge jalpy somaǧa ötemaqy tölendı.
“Adyrna” ūlttyq portaly
