Atyrauda qaŋtar oqiǧasyna bailanysty qamalǧan 8 küdıktı aştyq jariialady. 9 nauryzda UG-157/1 mekemesınıŋ aldyna küdıktılerdıŋ tuystary jinalyp, jaqyndaryn körsetudı talap ettı, dep habarlaidy Aq Jaiyq basylymy.
Adam qūqyqtary jäne zaŋdylyqty saqtau biurosynyŋ Atyrau oblysy boiynşa bölımşesınıŋ direktory mındetın atqaruşy Dariia Ūljaǧalievanyŋ aituynşa, küdıktıler aştyqty älı jalǧastyryp jatyr. Ol 9 nauryzda keşke tergeu izoliatoryna kırıp şyqqan. Onyŋ aituynşa, negızınen "Jappai tärtıpsızdık ūiymdastyru" jäne "Bilık ökılıne küş qoldanu" baptary boiynşa küdıkke ılıngen azamattar özderın üiqamaqqa şyǧarudy talap etıp otyr. Būǧan qosa, qaŋtar aiynda ūstau kezınde "azaptalǧan" küdıktıler özderın qinaǧan poliseilerdı jauapqa tartudy talap etken.
– Keşe keşke kırıp şyqtym. Jıgıtterdıŋ barlyǧymen söilesıp şyqtym. Būǧan deiın tergeu izoliatorynan tört adamdy jıbergen eken. Qalǧandary da üiqamaqqa şyqqysy keledı. Olar aştyq jariialaǧany turaly ötınıştı türme äkımşılıgıne 9 nauryzda bergen. Denelerın qarap şyqtym. Eşqandai jaraqat joq. Olardyŋ rūqsatymen keibırın suretke tüsırıp aldym. Sebebı dalada analary jylap, eŋırep tūrdy. Olar oblys prokurorymen kezdesudı talap ettı. Kezdeskenın-kezdespegenın bılmeimın. Küdıktıler özderın qinaǧan polisiia qyzmetkerlerın jauapqa tartudy talap etıp otyr, – dedı ol 10 nauryzda taŋerteŋ Azattyq tılşısıne.
Onyŋ aituynşa, 8 adamnyŋ bıreuı qūrǧaq aştyq jariialaǧan. Qalǧany su ışedı. Jalpy tergeu izoliatorynda qaŋtar oqiǧasy boiynşa qamalǧandar 20-dan asady.
– Keşe jaǧdailary qalypty boldy. Türme äkımşılıgıne aştyq jariialaǧandarǧa medisinalyq kömek körsetu qajettıgın aittym, – dedı biuro bölımşesınıŋ basşysy.
Beisenbı künı Azattyq tergeu izoliatoryna habarlasqan kezde mekeme basşysy Meiırbek Baqtyǧaliūly bırneşe küdıktınıŋ aştyq jariialaǧanyn rastady. Qalǧan sūraqtardy Qylmystyq-atqaru jüiesı departamentı ökılderıne qoiu qajettıgın aitty. Azattyq tılşısı departamentten äzırge jauap ala almady.
"Aq Jaiyq" basylymynyŋ jazuynşa, narazylar aştyqty 6 nauryzda jariialaǧan. Basylym ata-analardyŋ şaǧymdary men prokuratura ökılderınıŋ olarǧa bergen jauabynan video jariialady.
Küdıktılerdıŋ bırınıŋ anasy Äliia Mahambetovanyŋ aituynşa, ūly mekemedegı antisanitariia men tamaqtyŋ sapasyna şaǧymdanǧan.
"Ūlym özderın qūr suǧa äzırlengen arpamen tamaqtandyratynyn aitty. Azaptau turaly aitqan joq, mümkın bızdı, jaqyndaryn alaŋdatqysy kelmegen bolar. Bıraq bügın olardy 13 qaŋtarda türmege jetkızgennen keiın rezeŋke taiaqpen ekı būtynyŋ arasynan ūrǧanyn bıldım. Jany qysylǧandyqtan qazır aityp otyr. Tergeu izoliatory qyzmetkerlerınıŋ qysymynan keiın olar tamyrlaryn kesetının aityp otyr. Äleumettık jelıde de video bar" dedı Äliia Mahambetova.
Türme aldyna jinalǧan ata-analardyŋ aldyna şyqqan arnaiy prokuratura ökılderı Älıbi Mūstafin jäne Asylbek Mūqanov azaptau turaly aqparatty tekseretının aitqan.
"Antisanitariia men tamaqtanuǧa qatysty şaǧymdy özge ärıptesterım tekseredı, al tergeu izoliatoryndaǧy azaptaular jaily şaǧymdar bügıngı künge deiın tüsken joq bolatyn, qazır tekseremız" dedı prokuratura ökılderı.
- Qazaqstanda Qaŋtar oqiǧasynan soŋ myŋdaǧan adam ūstalyp, jüzdegen adam "terrorizm", "tärtıpsızdık", "qaru ūrlau" jäne basqa da aiyptarmen qamauǧa alynǧan. Qamalǧandardyŋ köbı türmede azaptalǧandaryn aitqan edı. Bas prokuratura nauryz basynda qaŋtar oqiǧasynan keiın azaptau şaǧymdary boiynşa qozǧalǧan qylmystyq ıster 200-den asqanyn, 9 qyzmetker ūstalǧanyn habarlaǧan.
- Qūqyq qorǧauşylar Qazaqstan bilıgın Qaŋtar oqiǧasyn halyqaralyq deŋgeide tekseruge şaqyrǧan edı, bıraq Nūr-Sūltan būl ūsynystan bas tartty.
- Qūqyq qorǧauşylar azaptau jaily şaǧymdardyŋ sotqa sirek jetetının aitady.
