Ulytaý ulttyq tarıhı-mádenı jáne tabıǵı murajaı-qoryǵynyń qyzmetkeri jáne eńbek ardageri Sársenbaı Qotyrashov Qazaqstannyń keń baıtaq dalasyn jaıaý júrip ótpek, dep habarlaıdy “Adyrna” ulttyq portaly QazAqparatqa siltep.
Qarashaǵa deıin 72 jastaǵy aqsaqal búkil eldi aralap, qoldanbaly óner sheberlerimen kezdesip, ózge óńirlerdiń turǵyndaryn Ulytaý aýdanynyń tarıhymen jáne kıeli jerlerimen tanystyrmaq.
Ol kúnine 40 shaqyrym jol júrýdi josparlap otyr.
«Ulytaýǵa bardyń ba?» dep atalatyn jaıaý marafon keshe bastaldy. Alys jolǵa shyǵar aldynda Sársenbaı Qotyrashov «Ulytaý» murajaı-qoryǵyndaǵy áriptesterimen kezdesip, óz baǵytymen bólisti.
«Men jeti jyl boıy jaıaý marafonǵa daıyndaldym. Meniń maqsatym – qolóner sheberlerimen kezdesip, qazaq halqyn Ulytaý tarıhymen tanystyrý. Sonyń ishinde «Kókmaısa» festıvalin nasıhattaý da bar. Men Qazaqstannyń barlyq óńirlerin aralap ótýdi josparlap otyrmyn. Qyzylorda, Túrkistan, Shymkentten bastaımyn. Ári qaraı Taraz, Almaty, Taldyqorǵan qalalaryna jol tartamyn.Qazaqstannyń úzdik qolónershileriniń tizimin jasaǵym keledi. Meniń búkil baǵytym áleýmettik jelilerde jarııalanady», – deıdi saıahatshy.
Marafonshynyń joly: Ulytaý – Qyzylorda – Túrkistan – Shymkent – Taraz –Almaty – Taldyqorǵan – Aıakóz – Semeı – Pavlodar – Nur-Sultan – Kókshetaý – Petropavl – Qostanaı – Aqtóbe – Oral – Atyraý – Beıneý – Aqtaý.
”Adyrna” ulttyq portaly
