Búgin L.N.Gýmılev atyndaǵy Eýrazııa ulttyq ýnıversıtetinde belgili tulǵalardyń qatysýymen genaral, saıası ǵylymdar doktory, professor Erjan Isaqulovtyń «Shyńǵys han» (orys tilinde), belgili shyǵystanýshylar Záripbaı Orazbaı men Muhammedzafar Orazbaevtyń «Uly túrik tarıhy» atty zertteý kitaptarynyń tanystyrylymy ótti, dep habarlady adebiportal.kz.
Atalmysh ǵylymı konferenııany fılologııa ǵylymdarynyń doktory, porfessor Dıhan Qamzabekuly júrgizdi. Qos kitaptyń saltanatty betasharyna elimizdiń memleket jáne qoǵam qaıratkerleri men ǵalymdar, stýdentter qaýymy qatysty.
Shara barasynda Qýanysh Sultanuly, Serik Ahymbekov, Abaı Tasbolatov, Álı Bektaev, Lázzat Súleımen, Ǵanı Tashqaraev, Nurlan Beknazar, Edil Jańbyrshın, Ádilǵazy Bergenov, Darhan Myńbaı syndy ult rýhanııatynyń ókilderi atalmysh kitaptar týraly kózqarastaryn bildirdi.
Ǵalym Erjan Isaqulovtyń «Shyńǵys han» kitaby týraly alǵashqy sózdi tarıh ǵylymdarynyń doktory Musabalına Gúlnar Tóleýǵazyqyzy aldy. Ol shaǵyn ǵana baıandamasynda kitaptyń tarıhı qundylyǵyna, el rýhanııatyndaǵy ornyna aıryqsha toqtaldy.
Sonymen qatar, osy ýaqytqa deıin tarıhshylar tarapynan Shyńǵys han týraly elenbeı, eskerýsiz kelgen derekterdiń osy kitapta ǵylymı aınalymǵa túskeni týraly da basa aıtyp ótti.
Belgili shyǵystanýshylar Záripbaı Orazbaı men Muhammedzafar Orazbaevtyń «Uly túrik tarıhy» atty zertteý eńbegi týraly sózdi belgili qalamger, tarıh ǵylymdarynyń doktory, professor Tursynhan Zákenuly aldy.
Ǵalym Tursynhan Zákenuly óz sózinde búgingi tarıhı dúnıe tanymymyzdaǵy qordalanyp qalǵan máselelerdi, tarıhı burmalaýshylyqtardy tilge tıek etti. Rýhanı negizdegi órkenıetti el bolý úshin tarıhı sanany jańǵyrtýdyń mańyzyna toqtaldy.
Ultymyzdyń tarıhynda uly túrik qaǵanatynyń oryny aıryqsha ekenine, barlyq ǵalymdar men zııaly qaýymdy, ákimdikter men ınstıtýttardy Kúltegin jáne Tonykók syndy túrik jazýlary men túrik mádenıetine qatysty rýhanı baılyǵymyzdy nasıhattaý sharalaryn júıeli júrgizýge shaqyrdy.
Ǵalym sóz sońynda Shyńǵys han taqyrybyna asa abaı bolýdy, qoǵamda aıtylyp júrgen jańsaq pikirlerdi der kezinde jónge salyp otyrýdy ortaǵa salyp, Shyńǵys han bul kúnde tutas túrki jurtyn ajyratýshy emes, qaıta biriktirýshi tulǵaǵa aınalýy kerektigin eskertip ótti.
«Shyńǵys han», «Uly túrik tarıhy» syndy qos ǵylymı kitaptyń tusaýyn Qýanysh Sultanuly, Serik Ahymbekov, Abaı Tasbolatov, Vladımır Jumahanov, Vladımır Bojko jáne Ádilǵazy Bergen syndy el aǵalary men memleket jáne qoǵam qaıratkerleri kesip, qos ǵylymı eńbekke sát sapar tiledi.
Ǵylymı konferenııaǵa qatysqan qoǵam qaıratkerleri men ǵalymdar ózara sóz alyp, atalǵan tarıhı eńbekterdiń mańyzy men atqaratyn qyzymetine keńinen toqtalyp ótti. Avtorlarǵa oqyrman tarapynan zor rızashylyqtaryn bildirdi.
Qazirgi kezde elimizdiń aldynda turǵan ulttyq rýhanı jańǵyrý syndy keleli máselege qyzymet etýde, osyndaı tarıhı, ǵylymı sıpaty basym eńbekterdiń alar orynynyń mańyzy erekshe ekenin basa aıtty.
Sanaly ǵumyryn ǵylymǵa, ult isine arnaǵan Erjan Isaqulov, Záripbaı Orazbaı, Muhammedzafar Orazbaev syndy ǵalymdarǵa shyn kóńilden shyǵarmashylyq tabys tiledi.
“Adyrna” ulttyq portaly
