«AMANAT» partiiasy «Altyn dombyra»-dan bölek «Babalar amanaty» aitysyn ūiymdastyrudy ūsyndy.
Bügın «AMANAT» partiiasy janyndaǧy Azamattyq qoǧam men mädeniettı damytu jönındegı «Miras» respublikalyq qoǧamdyq keŋesınıŋ biylǧy alǧaşqy otyrysy öttı. Oǧan deputattar, ükımet müşelerı, qoǧam qairatkerlerı men ziialy qauym ökılderı qatysty. Keŋeste Memleket basşysynyŋ Joldauynda aiqyndalǧan reformalardy jüzege asyru kezeŋınde BAQ-tyŋ rölı, jauapkerşılıgı, äleumettık küiı, käsıbi äleuetı jäne «Jaŋa Qazaqstan: mädeni-ruhani älem jäne kıtap şyǧaru» taqyryptary qaraldy.
Partiianyŋ kezekten tys HHII-şı Sezınde Prezident, partiia Töraǧasy Qasym-Jomart Toqaev partiiany tübegeilı qaita jaŋǧyrtudyŋ maqsat-mındetterın aiqyndap, «AMANAT» partiiasynyŋ memlekettıŋ täuelsızdıgı men eldıŋ bırlıgı üşın qyzmet etetınıne zor senım bıldırdı.
Osy oraida keŋes otyrysyn aşqan partiia Atqaruşy hatşysy Ashat Oralov soŋǧy ekı aida qoǧamda, partiia qūrylysynda ülken özgerıster oryn alyp, Jaŋa Qazaqstan qūru jolyndaǧy transformasiianyŋ partiiadan bastalǧanyn aitty.
Ol halyqpen kerı bailanysty jetıldıru maqsatynda qūrylymy qaita jasaqtalǧan partiia janyndaǧy qoǧamdyq keŋesterdıŋ jūmysyndaǧy özgerısterge toqtaldy. Onyŋ aituynşa, «AMANAT» partiiasy biyl ūlttyq mädeniet pen önerdı qoldauda bırneşe ıs-şarany qolǧa alady. Sonyŋ bırı – aitys.
«Dästürlı «Altyn dombyra» aqyndar aitysynan bölek biyl «Babalar amanaty» aitysyn da ūiymdastyrudy ūsynamyz. Partiia ärdaiym halyqtyŋ sözın söileitın söz zergerlerın qoldaidy. Būdan bölek, biyl elımız ūlt ūstazy Ahmet Baitūrsynūlynyŋ 150 jyldyǧy, Mūhtar Äuezovtyŋ 125 jyldyǧy jäne Ǧabit Müsırepovtıŋ tuǧanyna 120 jyl sekıldı aituly datalardy atap ötedı. Osy mereitoilardy atap ötuge partiia jan-jaqty qoldau körsetedı», - dedı A.Oralov.
Keŋes otyrysynda söz alǧan Mädeniet jäne sport ministrı Däuren Abaev Prezident Joldauynda aitylǧan mädeni mūralarymyz ben tarihymyzdy tanuǧa qatysty qoiylǧan mındetterge säikes, ministrlıktıŋ qolǧa alǧan auqymdy jūmystaryna toqtaldy.
«Kıtap şyǧaru ısın odan ärı damytu üşın jas qalamgerlerdı qoldau asa maŋyzdy. Osy rette 2023 jyldan bastap jas qazaqstandyq jazuşylar men aqyndar üşın arnaiy Prezidenttık ädebi syilyq taǧaiyndalady. Qazır tiıstı memlekettık organdarmen Jarlyq jobasy äzırlenude. Oǧan qosa biyl ministrlık «Üzdık balalar şyǧarmasy», «Jyldyŋ üzdık kıtaby», «Jas qalamger» atty konkurs-jobalardy jüzege asyrudy közdep otyr», - dedı ministr.
Keŋestıŋ jaŋa töraǧasy, Mäjılıs deputaty Amanjol Ältai jaŋa qūramdaǧy «Miras»-tyŋ jūmysyna sättılık tılei otyryp, azamattyq qoǧam qalyptastyru men mädeniet salalaryn damytudaǧy qordalanǧan mäselelerdı bırıgıp talqylau, naqty ūsynystar aitu ortaq maqsat ekenın jetkızdı.
«Prezidentımız Q.K.Toqaevtyŋ «Jaŋa Qazaqstan: Jaŋaru men jaŋǧyru» atty Qazaqstan halqyna Joldauynda Azamattyq qoǧam instituttary men BAQ ökılderınıŋ rölın arttyruǧa basa nazar audarǧan bolatyn. Bügıngı bızdıŋ talqylau alaŋymyz osy taqyrypqa baǧyttalady. Älemdık keŋıstıkte aqparattyq şabuyl örşıp tūrǧan bügıngı kürdelı kezeŋde elımızdıŋ aqparattyq keŋıstıgın nyǧaitu – negızgı strategiialyq maqsatymyzdyŋ bırı. Būl tūrǧyda Prezident Joldauynda eskertılgendei, qoǧamymyzdy ydyratu üşın syrttan berıletın tapsyrmalarmen jūmys ısteuden, köleŋkelı qalamaqy üşın saiasi klandardyŋ basqa da toptardyŋ saiasatyna arbalyp qaludan saq boluymyz kerek. Bäsekege qabılettı jäne erkın, myqty BAQ qalyptastyru üşın ne ıstemek kerek?», - degen oidy ortaǧa tastady.
Būl rette «Qazaq media qauymdastyǧy» zaŋdy tūlǧalar bırlestıgı basqaru keŋesınıŋ töraǧasy Erbol Azanbek qazaqtıldı aqparat qūraldary ūşyrasatyn tüiındı mäselelerge toqtaldy. Onyŋ aituynşa, bügınde qazaq tılındegı saittardyŋ ırı jarnamalar tapsyrysyna qoly jetpeidı. Qarjy tapşylyǧynyŋ saldarynan bılıktı maman jaldai almaidy, säikesınşe bılıktı mamansyz sapaly kontent öndıru taǧy qiyndyq tuǧyzady.
«Memleket jäne äleumettık jauapkerşılık şeŋberınde biznes osy mäselege nazar audarsa. Memlekettık tapsyrystan bölek, türlı taqyryptaǧy granttyq jobalar jasalyp, jekelegen jurnalister, redaksiialar konkurs negızınde granttardy ūtyp alu arqyly kontent jasau mümkındıgıne ie bolar edı», - dedı E.Azanbek.
Öz kezegınde, Aqparat jäne qoǧamdyq damu ministrı Asqar Omarov BAQ salasyn qūqyqtyq retteudı jetıldıru, aqparat salasy qyzmetkerlerınıŋ käsıbilıgın nyǧaitu, otandyq BAQ-tyŋ bäsekege qabılettılıgın odan ärı damytu baǧytynda qolǧa alynǧan ısterge toqtaldy.
«Osy salada memlekettık retteudıŋ tiımdı tetıgın qūru maqsatynda zaŋ jobasyn äzırleu jūmysy bastaldy. Bız ūsynystar jinap, sarapşylarmen bırlese otyryp zaŋnamany jetıldıru tetıkterı boiynşa konsepsiia äzırleimız. Ol üşın BAQ, azamattyq qoǧam, ÜEŪ ökılderın, qoǧam qairatkerlerı jäne basqa da müddelı ūiymdardyŋ basyn qosyp, arnaiy jūmys toby qūryluda», - dedı ministr.
«Habar» Agenttıgı» aksionerlık qoǧamynyŋ Basqarma töraǧasy Berık Uäli Memleket basşysy Q.K.Toqaevtyŋ «Jaŋa Qazaqstan: Jaŋaru men jaŋǧyru» atty Qazaqstan halqyna Joldauynyŋ mänı de maŋyzy da airyqşa ekenın aitty.
«Memleket basşysynyŋ Joldauynda aiqyndalǧan reformalardy jüzege asyru kezeŋınde BAQ salasynyŋ jauapkerşılıgı, äleumettık, käsıbi äleuetı öte zor bolmaq. Jaŋa Qazaqstandy qūru jolynda elımızdıŋ basty arnasy bel şeşıp kırısıp, ideologiialyq tūrǧyda jūmys ısteidı. Prezidenttıŋ bastamalaryn bızdıŋ arnalarymyz aldaǧy uaqytta da halyqqa keŋınen nasihattap, jetkızuge qaşanda daiyn», - dedı.
Sondai-aq, keŋeste «mecenat.kz» jobasynyŋ äzırleuşılerı qazaq qalamgerlerınıŋ şyǧarmalaryna arnaiy bäige jariialaityny aityldy.
Olar jüzden jüirık şyqqan jazuşynyŋ şyǧarmalaryn jeke kıtap etıp jariialap, jeŋımpaz şyǧarmanyŋ avtoryna ömırınıŋ soŋyna deiın ai saiyn 500 dollar kölemınde syiaqy beruge niettı.
Jobany äzırleuşı toptyŋ müşesı, telejurnalist Äigerım Aǧyltaeva ūlttyq ädebiettıŋ damuyna odan ärı üles qosu, ädebiette jaŋa esımderdı tanytu, üzdık romandardy oqyrmanǧa ūsynyp, roman jazudy ılgerıletu maqsatynda qolǧa alynǧan jobaǧa Freedom Holding Gorp. investisiialyq tobynyŋ negızın qalauşy, belgılı qarjyger Timur Turlov qarjylai qoldau körsetetının jetkızdı.
”Adyrna” ūlttyq portaly
