Qyzylorda oblysynyń jańa ákimi Nurlybek Nálibaev keńesshilerden bas tartty.
Aımaq basshysy oblys ákimdiginiń keńeıtilgen jıyn otyrysynda QR Prezıdenti Qasym-Jomart Toqaevtyń tapsyrmasyna sáıkes memlekettik apparatty ońtaıly jáne tıimdi etý maqsatynda baǵyttas basqarmalardy biriktiretinin málimdedi. 24 basqarmanyń 8-i qysqaryp, oblys ákimdiginiń qurylymynda 16 basqarma qalatynyn jetkizdi.
«Ózderińiz bilesizder, óńirde 24 oblystyq basqarma jumys jasaıdy. Endi, sonyń 8-i qysqaryp, oblys ákimdiginiń qurylymynda 16 basqarma qalatyn bolady. Qabyldanǵan sheshim qyzmetterdiń qaıtalanýyn joıýǵa, jalpy jumys mólsheriniń tepe-teń rettelýin qamtamasyz etýge jáne basshylyq quramdy ońtaılandyrý esebinen ákimshilik shyǵyndardy qysqartýǵa múmkindik beredi. Dál osylaı qala jáne aýdan ákimdikteriniń de qurylymyn ózgertý qajet», - dedi oblys ákimi.
Sondaı-aq, Nurlybek Nálibaev ákim apparatynda aldaǵy ýaqytta oblys ákiminiń shtattaǵy jáne shtattan tys keńesshi laýazymdary bolmaıtynyn málimdedi.
«Budan ári oblys ákiminiń shtattaǵy jáne shtattan tys keńesshi laýazymdary bolmaıdy. Kez kelgen adamǵa keńesshi degen kýálikti tarata berýdi qoıýymyz kerek. Bizdiń keńesshimiz – halyq!», - dedi oblys ákimi.
