Onlain habarlama, jarnama beruge arnalǧan OLX platformasynyŋ Qazaqstandaǧy segmentınde şeteldıkterge, onyŋ ışınde RF azamattaryna, zaŋdy tūlǧalaryna «Qazaqstan JSN-ın (jeke säikestendıru nömırı) jäne BSN (biznes säikestendıru nömırı) aluǧa kömektesemın» deitın jarnama paida boldy, dep habarlaidy “Adyrna” ūlttyq portaly 7kun.kz saityna sılteme jasap.
Mūndai jarnamalardyŋ denı nauryz jäne säuır ailarynda şyqqan. Jarnama mätınınde 1000 rublge nemese 5500-6000 teŋgege ekı kün ışınde qazaqstandyq JSN jasap beremız delıngen.
Odan bölek reseilıkter üşın qūjat räsımdeu, JŞS (jauapkerşılıgı şekteulı serıktestık), JK (jeke käsıpkerlık) aşu, bankten esepşot aşu, karta jasau sekıldı qyzmetter ūsynǧan jarnama köp. Osyndai saryndaǧy jarnamanyŋ denı Almaty, Nūr-Sūltan, Qaraǧandy, Petropavl, Qostanai, Öskemen, Qaraǧandy sekıldı qalalardan.
Būl ıs-ärekettıŋ qanşalyqty zaŋdy? Jalpy JSN-dı internette aşyq saudalaudyŋ saldary qandai? Belgılı zaŋger Kamişa Esmūhambetqyzy būl äreket mülde zaŋsyz dep esepteidı.
«Mūndai qyzmet türlerın zaŋdy tırkelgen organ atqaru kerek nemese senımhat arqyly jüzege asuy kerek. Özge tūlǧaǧa qatysty jeke mälımetterge qol sūǧuǧa tyiym salynǧan. Būl – alaiaqtyq äreketterdıŋ körınısı», — deidı zaŋger.
Şeteldık azamattar JSN-dı qandai jaǧdaida aluy tiıs?
Qazaqstan zaŋdary myna jaǧdaida şeteldıkterdıŋ JSN aluǧa mındettı ekenın körsetedı:
- Qazaqstan bankterınde aǧymdaǧy esepşot aşqanda;
- Şeteldık Qazaqstan aumaǧynda tabys tapqanda;
- Qazaqstan aumaǧynda satyp alǧan jyljymaly mülıkke salyq töleuge mındettı bolǧanda;
- Qazaqstanda tırkelgen zaŋdy tūlǧa — kompaniianyŋ basşysy bolyp taǧaiyndalǧanda;
- Şeteldık azamat basqa elde tırkelgen zaŋdy tūlǧanyŋ Qazaqstandaǧy filialynyŋ, ökıldıgınıŋ basşysy bolyp taǧaiyndalǧanda.
“Adyrna” ūlttyq portaly
