Ädılet ministrı Qanat Musin memleket basşysy ūsynǧan jaŋa konstitusiialyq tüzetuler boiynşa kımnıŋ memlekettık qyzmetke sailana almaitynyn aitty, dep habarlaidy “Adyrna” ūlttyq portaly Zakon.kz saityna sılteme jasap.
Parlament otyrysynda prezident Qasym-Jomart Toqaev «Memleket basşysy barlyq azamattar üşın mümkındıkter teŋdıgınıŋ myzǧymas kepılı boluy tiıs", - dedı. Sondai-aq, prezidenttıŋ jaqyn tuystaryna saiasi memlekettık qyzmetke jäne kvazimemlekettık sektor basşylyǧyna sailanuyna zaŋ tūrǧysynan tyiym salu qajet ekenın aitty.
Qoǧamda osy konstitusiialyq tüzetulerge qatysty talqy bolyp, jurnalister Ädılet ministrlıgıne «Memleket basşysynyŋ tuystary diplomatiialyq korpustaǧy saiasi qyzmetın jalǧastyra ala ma?», degen sūraq joldady.Osy sūraq boiynşa jauap bergen Ädılet ministrı Qanat Musin - memleket basşysy prezidenttıŋ jaqyn tuystary saiasi memlekettık lauazymdardy atqarmauy kerektıgın naqty aityp, būl normany Konstitusiiada bekıtudı tapsyrǧanyn mälımdedı.
«Atalǧan tyiym konstitusiialyq tüzetuler jobasyna engızıldı. Tüzetuler qabyldanyp, küşıne engen kezde qandai da bır lauazymdy qyzmettı atqaru mümkındıgı ekı faktorǧa bailanysty bolady. Olar: Tuystyq qatynastyŋ zaŋmen anyqtaluy jäne lauazymnyŋ Konstitusiiada belgılengen sanattarǧa jatqyzyluy. Ärine, osy ekı şart tolyq oryndalǧan kezde tyiym salu jüzege asady», -dedı Qanat Musin.Ministrdıŋ aituynşa, būl norma memleket basşysynyŋ jaqyn tuystaryna ǧana qatysty bolmaq. Mäselen, "Neke (erlı-zaiyptylyq) jäne otbasy turaly" QR Kodeksıne säikes jaqyn tuystar degenımız - ata-ana, balalar, balany asyrap aluşylar, asyrap alynǧan balalar, ata-anasy bır jäne ata-anasy bölek aǧa-ınılı men apa-sıŋlıler, ata-äjeler, nemerelerı. Musin sondai-aq, saiasi lauazymdar QR prezidentınıŋ 2015 jylǧy 29 jeltoqsandaǧy № 150 Jarlyǧymen bekıtılgen saiasi jäne äkımşılık memlekettık qyzmetşıler lauazymdary tızılımınde körsetılgenın atap öttı. Olarǧa prezidentke esep beretın ortalyq memlekettık organdar men memlekettık organdardyŋ basşylary, prezident äkımşılıgı men premer-ministr keŋsesınıŋ basşylary, oblystardyŋ, qalalardyŋ, audandardyŋ äkımderı, tötenşe jäne ökılettı elşıler jäne basqa da bırqatar lauazymdar kıredı. Kvazimemlekettık sektordaǧy basşylyq lauazymdar degenımız - qūryltaişysy, qatysuşysy nemese aksionerı memleket bolyp tabylatyn memlekettık käsıporyndardyŋ, ūlttyq basqaruşy holdingterdıŋ, ūlttyq kompaniialardyŋ basşylary, - dep sözın tüiındedı Musin.
“Adyrna” ūlttyq portaly
