Memleket basşysy Qasym-Jomart Toqaev Qazaqstan halqyn 1 mamyr – Bırlık künı merekesımen qūttyqtaidy, dep habarlaidy "Adyrna" ūlttyq portaly Aqordanyŋ baspasöz qyzmetıne sılteme jasap.
"Qymbatty otandastar! Sızderdı Qazaqstan halqynyŋ bırlıgı merekesımen şyn jürekten qūttyqtaimyn! Mamyrdyŋ osy mamyrajai merekesı – elımızdıŋ tūtastyǧy men yrys-yntymaǧynyŋ simvoly. Dostyq pen özara tüsınıstık dästürlerı halqymyzdyŋ sana-sezımınde berık ornyqqan. Būl qasietter berekelı ömırdıŋ, beibıtşılık pen kelısımnıŋ özegı bolyp otyr. Taǧdyrdyŋ jazuymen keŋ baitaq qazaq jerınde toǧysqan är aluan mädenietter tūtasa kele ūlttyq bıregeilıgımızdıŋ ajyramas bölıgıne ainaldy. Bızdıŋ maqsatymyz bır, qūndylyqtarymyz ortaq. Myzǧymas bırlıktıŋ arqasynda qiyndyqtan qaimyqpai, jahandyq syn-qaterdıŋ bärın eŋserıp kelemız. Bügınde Jaŋa Qazaqstandy qūru bastamasy bükıl qoǧamdy ūiystyruda. Būl ideia el azamattarynyŋ jasampazdyq quatynan bastau alady. Memleketımızdı jan-jaqty jaŋǧyrtuǧa ärqaisymyz öz ülesımızdı qosuymyz kerek. Barşaŋyzǧa zor densaulyq, tolaǧai tabys tıleimın! Aspanymyz ärdaiym aşyq bolsyn!", - delıngen Prezident qūttyqtauynda.
"Adyrna" ūlttyq portaly
