Atyrauda qant saudasyna şekteu qoiyldy. Är tūtynuşy endı 3 kelıden artyq satyp ala almaidy, dep habarlaidy «Adyrna» tılşısı «Habar 24»-ke sılteme jasap.
Būl jaǧdai mūnaily öŋır tūrǧyndarynyŋ arasynda qyzu talqyǧa tüsıp jatyr. Tıptı ailaǧa köşıp, bır adam sauda nüktesınen bır künde bırneşe ret qant satyp alǧany anyqtalǧan. Endı tūrǧyndar qantty tek şekteulı mölşerde ǧana ala alady. Ministrlıktıŋ özı tapşylyq bar ekenın jasyrmai otyr. Osyndai qysyltaiaŋ uaqytta qaltanyŋ qamyn oilap, ailaǧa basqandar da bar. Bır adamnyŋ 1 kün ışınde qaladaǧy sauda nüktelerınıŋ bırınen 18 ret qant satyp alǧany anyqtaldy.
«Bız beinebaqylau kameralary arqyly tekseru jürgızgenbız. 1 adamnyŋ supermarketke 18 ret kelıp, qant alǧanyn anyq baiqadyq. Olar osy jerden arzan baǧada satyp alyp, keiın ony qymbatqa saudalaidy. Alyp-satarlardyŋ ailasyn jüzege asyrmau üşın, endı supermarket sörelerıne qant belgılı bır uaqytqa ǧana şyǧarylady. Tıptı reidtık şaralar da qolǧa alynbaq»,– dedı qalalyq käsıpkerlık jäne auyl şaruaşylyǧy bölımı basşysynyŋ orynbasary Altynai Erubaeva.Sauda jäne integrasiia ministrlıgı Resei Federasiiasynyŋ qant eksportyna salǧan tyiymynyŋ kesırınen tapşylyq tuyp otyr deidı. Ministrlıktıŋ mälımetınşe, endı 31 tamyzǧa deiın elımızge 350 myŋ tonna kölemınde qant jetkızu josparlanyp otyr.
