QR Eńbek jáne halyqty áleýmettik qorǵaý mınıstri Tamara Dúısenova Úkimet otyrysynda sóılegen sózinde halyqty jumyspen qamtýǵa arnalǵan qosymsha sharalar týraly aıtty, dep habarlaıdy «Adyrna» tilshisi.
Sóziniń basynda mınıstr 2000 jyldardan keıin dúnıege kelgen urpaqtyń eseıgenin, jyl saıyn osyndaı 300 myńnan astam jastyń eńbek naryǵyna qosylatynyn atap ótti. Sonyń nátıjesinde jumys kúshiniń jańa sapalyq qurylymy qalyptasyp jatyr. Búginde jalpy jumys kúshiniń 60 paıyzy mıllenıaldar men Z býynnyń enshisinde.
Osy úrdis qazirgi kúrdeli ahýal jáne aldaǵy yqtımal syn-qaterler jumyspen qamtý saıasatyn qaıta qaraý qajettigin kórsetip otyr. Onda azamattardy jaı jumyspen qamtý emes, shyn máninde sapaly jumys ornyn berý arqyly halyqtyń tabysyn arttyrý basty mindet bolmaq.
Eń aldymen, bos jumys oryndaryna onlaın jármeńke ótkizý arqyly jastardy eńbekpen qamtý qolǵa alynady. Aıtýynsha, ár aıdyń 24-30 aralyǵynda elektrondy eńbek bırjasy negizinde bos jumys oryndarynyń onlaın jármeńkesi ótpek.
«Bıyl mamyr aıynda ERG kompanııalar tobymen birlesip, bilim berý uıymdarynyń túlekterin jáne 35-ke deıingi jastardy jumysqa ornalastyrýdyń onlaın-jármeńkesi pılottyq rejımde ótkizildi. Kompanııa 350 jumys ornyn usyndy. Bir aptanyń ishinde jumys berýshiniń talaptaryna sáıkes keletin 159 jas irikteýden ótip, jumysqa qabyldandy. Elektrondyq eńbek bırjasy jáne onyń negizinde turaqty negizde ótkiziletin onlaın bos jumys oryndary jármeńkeleri jumys izdeýshiler men jumys berýshiler úshin eńbek naryǵynyń ashyqtyǵy men qoljetimdiligin qamtamasyz etýdiń mańyzdy jáne tıimdi quraly bolady»,– dedi ol.
