QR Bas prokuraturasy qyz alyp qaşqan jaǧdaida qandai jaza qarastyrylǧanyn aitty, dep habarlaidy «Adyrna» ūlttyq portaly.
«Qyz alyp qaşu – salt-dästür me, qylmys pa, mūny ajyratudyŋ bır joly bar, ol – qalyŋdyqtyŋ kelısım beruı jäne alyp qaşqan adamdardyŋ osyndai kelısımnıŋ baryn tüsınuı. Basqaşa aitqanda, kelısım bermegen qyzdy erkınen tys alyp qaşsa, küştep ūstap, basqa jerge aparsa, alyp qaşqandar osy män-jaidy bılse – būl auyr qylmys sanalady. Qylmystyq kodekstıŋ 125-baby – adam ūrlau boiynşa 4 jyldan 7 jylǧa deiın bas bostandyǧynan aiyru jazasy qarastyrylǧan. Al eger kämeletke tolmaǧan qyzdy ūrlasa, būl jaǧdaida 7 jyldan 12 jylǧa deiın sottaluy mümkın jäne mülkı tärkılenedı»- dedı Bas prokuratura.
Vedomstvonyŋ habarlauynşa, būl qylmys üşın eŋ qatal jaza – 15 jylǧa sottalady. Onyŋ ışınde top bolyp alyp qaşsa, jäbırlenuşını abaisyzda öltırıp alu jäne basqa auyr jaǧdailarǧa äkep soqsa, ūrlanǧan adamdy qanau maqsatynda jasalsa, osyndai auyr jaza qoldanyluy mümkın.«Eger sızdı alyp qaşsa nemese köz aldyŋyzda osyndai jaǧdai bolsa, dereu 102 qyzmetıne qoŋyrau şalyŋyz. Polisiiaǧa mümkındıgınşe kölıktıŋ markasy, tüsı, nömırı, alyp qaşqandardyŋ tür-älpetı, kiımı sekıldı erekşe belgılerdı habarlaŋyz. Būl jaǧdaida jai ǧana kuäger bolsaŋyz da, aryz jazylmasa da qylmystyq ıs qozǧalyp, tergeu bastalady. Eger ūrlaǧan adam jäbırlenuşını bosatsa jäne onyŋ äreketınde qylmystyq qūram bolmasa, ol qylmystyq jauapkerşılıkten bosatylady» -delıngen habarlamada. Qazırgı taŋda elımızdıŋ oŋtüstıgınde qyzdy alyp qaşu derekterı älı de köp. Tıptı, zorlyqpen ūstau deregı de kezdesedı.
«Adyrna» ūlttyq portaly.
