Memleket basşysy Qasym-Jomart Toqaev Būqaralyq aqparat qūraldary qyzmetkerlerın merekesımen qūttyqtady, dep habarlaidy «Adyrna» tılşısı.
«Qūrmettı jurnalister! Būqaralyq aqparat qūraldarynyŋ qyzmetkerlerı! Sızderdı käsıbi merekelerıŋızben şyn jürekten qūttyqtaimyn! Aqparat salasynda jūmys ısteu – ülken märtebe ärı zor jauapkerşılık. Otandyq baspasöz elımızdıŋ tūtastyǧy men tatulyǧyn nyǧaitu jolynda eleulı röl atqarady. Söz önerın qasiet tūtyp, abyroi biıgınen körınıp jürgen käsıbi jurnalisterımız az emes. Olar eselı eŋbegımen oqyrmannyŋ, körermennıŋ alǧysyna bölenude. Būl – el igılıgı jolyndaǧy adal ärı qajyrly eŋbekterıŋızge berılgen baǧa. Bügınde äleumettık jelılerde, internette jalǧan aqparat köbeiıp ketkenın körıp otyrmyz. Osyndai kürdelı jaǧdaida sızderdıŋ şynaiy ärı syni közqarastaryŋyz türlı keleŋsızdıkke tosqauyl bolar edı. Qazır qoǧamdaǧy basymdyqtar özgerıp jatyr. Käsıbi jurnalister qyzmetınıŋ maŋyzy arta tüstı. Bız Jaŋa, Ädılettı Qazaqstandy qūruǧa kırıstık. Būl – barşa otandasymyzdyŋ aldynda tūrǧan maŋyzdy mındet. Sızderdıŋ maqalalaryŋyz ben siujetterıŋız, jurnalistık zertteulerıŋız osy bastamaǧa üles qosary sözsız. Sondyqtan naǧyz käsıbi mamandardyŋ eŋbegın laiyqty baǧalaudyŋ simvoldyq mänı bar. Mırjaqyp Dulatūlynyŋ «Qai jūrttyŋ baspasözı myqty bolsa, sol eldıŋ özı de küştı» degen tūjyrymy bügın de barynşa özektı. Elımızdıŋ aqparattyq qauıpsızdıgı men ideologiialyq derbestıgın saqtau üşın otandyq jurnalisterdıŋ Qazaqstanda jäne älemde bolyp jatqan üderıster turaly öz közqarasy boluy kerek. Bız qoǧamǧa ülgı-önege körsetıp, memleket ısın ılgerıletuge atsalysuymyz qajet. Öitkenı halyqtyŋ senımın aqtau – azamattyq boryşymyz. Bız tatulyq pen bırlıktı saqtai otyryp, Jaŋa Qazaqstandy qūru jolynda jaŋa belesterdı bırge baǧyndyratynymyzǧa senemın. Barşaŋyzǧa şyǧarmaşylyq şabyt, tolaǧai tabys tıleimın!»— dedı ol.
