Almatydaǵy atyshýly "Altyn Orda" bazarynyń tóńiregindegi daý basylar emes. Qoǵam belsendileri sáýir aıynda basshylyq aýysqanymen, saýda ornynda zań buzýshylyqtar tolastamaı otyrǵanyn aıtty, dep habarlaıdy "Adyrna" ulttyq portaly "Stan.kz"-ke silteme jasap.
Nur-Sultanda BAQ ókilderiniń saýalyna jaýap bergen zańger Dáýren Ǵabdýl kórshi elderden kelgen toptar bazardy ózdiginshe bólip alyp, bıligin júrgizetinin aıtady. Ondaǵy únemi jazasyz qalatyn urlyq-qarlyq pen qoldan jasalǵan qymbatshylyqqa osy toptardyń qatysy bar deıdi ol.
"Bul shaǵyn saýda orny emes, iri logıstıkalyq torap. Almaty, Almaty oblysyn qamtamasyz etip otyrǵan saýda orny. Bul kem degende 3 mıllıon tutynýshysy bar startegııalyq nysan. Eger ol jerdiń jumysynda aqaý bolsa, bul árqaısymyzdyń ústelimizdegi nanymyzǵa, jep otyrǵan etimizge deıin áser etedi. Sondyqtan "Altyn ordanyń" taǵdyry árqaısymyzdy alańdatýy kerek", – dedi Dáýren Ǵabdýl.
Zańgerdiń sózinshe, osydan 3 aı buryn kelgen jańa qojaıyn bazardyń ortadaǵy adamdardyń qatysýymen kóteriletin baǵalarǵa qatysty bylyqtaryn joıýǵa ýáde etken.
"Altyn ordanyń" burynǵy quryltaıshylarynyń ústinen 2017 jyly bazardy reıderlik jolmen tartyp aldy degen aryz túsken bolatyn. Qazir saýda orynnyń eks basshylary bıznes oshaǵyn qaıtaryp almaqshy. Sáýir aıynan bastap Altyn Ordada baǵa tómendedi me? Halyq ony sezine aldy ma? Biz neni kúttik? Bazardyń basshylyǵy aýysyp, bári ózgeredi, jalǵa alýshylar jaqsy ómir súre bastaıdy, taýarlardyń baǵasy túsedi dep oıladyq. Qoǵam arqyly tártip ornatýǵa mindettimiz. Sebebi, basshylyqtyń aýysqanynyń ózi úlken kúmán týǵyzady", – deıdi zańger.
Saýdagerler tarapynan da kóptegen shaǵym túsip jatqan kórinedi. Olar "Altyn ordanyń" qazirgi qojaıyny tıisti jumystardy júrgize almaı jatqanyn aıtqan. Al kompanııada 95 paıyz úlesi bar astanadaǵy ekonomıkalyq tergeý departamentiniń burynǵy qyzmetkeri Erkebulan Hamzınniń quryltaıshylar quramyna qalaı kirgeni belgisiz deıdi zańger.
Zańsyzdyqtardy tizgen Ǵabdýl bul máselelerge bazardyń qazirgi ıeleri jaýap berip, tártip ornatýǵa mindetti dep otyr.
