«Olimp» bukmekerlık keŋsesınıŋ ısıne qatysty jaŋa mälımetter şyqty, dep habarlaidy “Adyrna” ūlttyq portaly Sputnik.kz saityna sılteme jasap.
Ekonomikalyq resurstardyŋ zaŋsyz şoǧyrlanuyna qarsy ıs-qimyl mäselelerı jönındegı komissiia qazır «Olimp» bukmekerlık keŋsesınıŋ lauazymdy tūlǧalaryna qatysty qylmystyq ıs aiasynda tärkılengen 5,5 mln AQŞ dollary men 200 myŋ eurony Ūlttyq bankke audaru prosedurasy jürıp jatqanyn mälımdedı.
«Būdan bölek, Qapşaǧai qalalyq sotynyŋ 95 mlrd teŋge şyǧyn keltırgen osy bukmekerlık keŋsenıŋ basşysy S. esımdı azamatty qonys-koloniiaǧa auystyru turaly 2022 jylǧy 6 mausymdaǧy qaulysynyŋ küşın joiu turaly jeke qoldauhat engızıldı», - dep mälımdedı komissiia.Osy ıs boiynşa memleket paidasyna 3,6 mlrd teŋge tärkılendı. Atap aitqanda, 4 ūşaq, 5 jer uchaskesı, 15 avtokölık, Almaty qalasynda 30 jyljymaityn mülık (tūrǧyn üi jäne tūrǧyn üi emes nysandar). «Olimp» ısı 2019 jyly jeltoqsan aiynyŋ basynda Ūlttyq qauıpsızdık komitetınıŋ Almaty qalasy boiynşa departamentı Qazaqstanda «Olimp» bukmekerlık keŋsesı jelısınıŋ qyzmetı uaqytşa toqtatylǧanyn mälımdegen bolatyn. Tergeu mälımetıne süiensek, kompaniia Qazaqstan zaŋnamasyn būzǧan jäne internet-resurstardy paidalanu arqyly zaŋsyz qyzmetpen ainalysqan. Al tüsken tabystan salyq tölemegen. Keiınırek «Olimp» lisenziiany jarty jylǧa toqtata tūru turaly sot şeşımıne şaǧym tüsıruge niettı ekenın habarlady. 2019 jylǧy 18 jeltoqsanda Almaty prokuraturasy «Olimp» bukmekerlık keŋsesın memleketke 145 mlrd teŋge töleuge mındettedı. Şeşım qalalyq memlekettık kırıster departamentı jürgızgen salyq tekserısı nätijesı boiynşa qabyldandy. «Olimp» bukmekerlık keŋsesınıŋ qyzmetın tekseru jarty jylǧa sozyldy. 2020 jyldyŋ basynda bukmekerlık keŋse stavka qabyldaudy toqtatty. Keiın «OlimpKZ bukmekerlık keŋsesı» JŞS basşylaryna halyqaralyq ızdeu jariialandy. Basşylarǧa bukmekerlık qyzmet atyn jamylyp, zaŋsyz oiyn biznesımen ainalysty, aqşany syrtqa şyǧardy jäne salyqtan jaltardy degen aiyp taǧyldy. Artynşa OlimpKZ bukmekerlık keŋsesınıŋ buhgalterı Chernogoriiadan ekstradisiialandy.
“Adyrna” ūlttyq portaly
