Sońǵy bes jyldyqta Qyzylorda qalasynyń bas josparyna sáıkes jańa móltek aýdandar boı kóterip, halyq sany qarqyndy artýda.
Máselen, Syrdarııa ózeniniń sol jaǵalaýynan boı kótergen jańa turǵyn aýdanda áleýmettik nysandar, kópqabatty turǵyn úıler jáne «Báıterek» móltek aýdanynan «Bala meken» eldi mekeni salynyp kópbalaly otbasylarǵa baspana tabystaldy. Sáıkesinshe, qala aýmaǵyndaǵy jolaýshylar tasymalynyń marshrýttyq syzbasy birshama ózgeriske ushyrap, móltek aýdandardy qoǵamdyq kólikpen tolyqtaı qamtamasyz etý qajettiligi týyndady.
Osy baǵytta qala kólemindegi jolaýshylar tasymaldaýǵa arnalǵan kólikterdiń jetkiliksizdigi týraly turǵyndar tarapynan kóptegen shaǵym túse bastady.
Máseleniń mán-jaıyn eskergen aımaq basshylyǵy qoǵamdyq kólik máselesin sheshý jáne halyq suranysyna saı qyzmet sapasyn arttyrý maqsatynda, «Qyzylorda Avtobýs parkine» qosymsha úlken syıymdylyqtaǵy, zamanaýı avtobýstar aldyrý jóninde sheshim qabyldady.
Aımaq basshysynyń tapsyrmasyna sáıkes, «Qyzylorda Avtobýs parki» JShS-niń jarǵylyq kapıtalyn ulǵaıtý maqsatynda «Ónerkásipti damytý qory» AQ arqyly lızıngke 150 avtobýs alý jumystary júrgizilýde. Qoǵamdyq kólikterdi aldyrý úshin alǵashqy 20 paıyz jarnasyn tóleý úshin oblystyq jáne qalalyq bıýdjetten tıisti qarajat qarastyryldy.
Aıta keteıik, jańadan alynǵan avtobýstar qalaishilik qoǵamdyq kólikterdiń 14 baǵytyn qamtıdy. Bul óz kezeginde qoǵamdyq kólik qyzmetiniń sapasyn arttyrýǵa aıtarlyqtaı septigin tıgizgeli otyr. Jolaýshylar tasymaldaýǵa arnalǵan syıymdylyǵy joǵary avtobýstar bıyl tolyq alynady dep josparlanyp otyr.
