Qasym-Jomart Toqaev Mūhammed ben Salman ben Äbdelaziz Äl Saudqa ıltipat bıldırıp, şaqyrǧany jäne qonaqjailyq körsetkenı üşın Saud Arabiiasynyŋ Korolı men Taq mūragerıne alǧys aitty, dep habarlaidy «Adyrna» tılşısı Aqordaǧa sılteme jasap.
Qazaqstan Prezidentınıŋ aituynşa, Memleket basşysy retınde Saud Arabiiasyna alǧaş ret kelgendıkten, būl sapardyŋ maŋyzy zor.
Qasym-Jomart Toqaev Saud Arabiiasy Qazaqstannyŋ basty strategiialyq serıktesterınıŋ bırı ekenın atap öttı.
– Saud Arabiiasy – Qazaqstannyŋ täuelsızdıgın bırınşı bolyp moiyndaǧan elderdıŋ bırı. Osy kezeŋde türlı baǧyttaǧy yntymaqtastyǧymyz nyǧaia tüstı. Qazır qazaq-saud qatynastary joǧary deŋgeide. Degenmen, ekı el arasyndaǧy yntymaqtastyqqa tyŋ serpın beretın kez keldı. Būl – elderımızdıŋ müddesıne sai keletın ortaq şeşım. Bızdıŋ özara tiımdı bailanystarymyz nyǧaia beredı dep senemın, – dedı Memleket basşysy.Kelıssöz barysynda sauda-ekonomikalyq jäne investisiialyq yntymaqtastyq mäselelerı talqylandy. Qazaqstan Saud investorlary üşın özara müddenı közdeitın türlı perspektivtı salalar boiynşa erekşe şarttar men keŋ kölemde artyqşylyqtar ūsynuǧa daiyn. Taraptar özara tauar ainalymyn edäuır arttyruǧa niettı ekenın jäne juyq arada ekı el ükımetterınıŋ būl baǧyttaǧy jūmystardy jandandyratynyn naqtylady. Mūhammed ben Salman ben Äbdelaziz Äl Saud elderımız arasyndaǧy qatynastar deŋgeiı jaqsy ekenın atap ötıp, ony ärı qarai nyǧaityp, damytu üşın mümkındıkter mol ekenın aitty. Sondai-aq būl baǧyttaǧy jūmystardy jandandyru qajet ekenıne toqtaldy. Onyŋ aituynşa, būl rette Qazaqstan men Saud Arabiiasynyŋ biznesmenderın bırıktıretın Iskerlık keŋestıŋ rölı zor bolmaq. Taq mūragerı Memleket basşysynyŋ resmi sapary aiasynda ötetın İnvestisiialyq döŋgelek üstelge Koroldıktıŋ ırı kompaniialarynyŋ ökılderı qatysatynyn jetkızdı. Onyŋ aituynşa, qazırgı jaǧdaida Saud Arabiiasynyŋ Memlekettık investisiialyq qory üilestıretın bırqatar joba boiynşa bırlesken jūmys maŋyzdy sanalady. Mūhammed ben Salman ben Äbdelaziz Äl Saud Koroldıktıŋ kompaniialary Qazaqstannyŋ agrarlyq salasyna investisiia saluǧa qyzyǧuşylyq tanytyp otyr. Onyŋ pıkırınşe, būl baǧyt jahandyq azyq-tülık daǧdarysy jaǧdaiynda asa özektı bola tüsedı. Qasym-Jomart Toqaev Taq mūragerın Qazaqstanǧa memlekettık saparmen keluge şaqyrdy. Mūhammed ben Salman būl şaqyrudy quana qabyldaitynyn aityp, qol jetkızılgen uaǧdalastyqtardy jüzege asyrudyŋ naqty nätijelerın talqylau üşın Qazaqstanǧa saparmen keluge daiyn ekenın jetkızdı.
