Qasym-Jomart Toqaev Muhammed ben Salman ben Ábdelazız Ál Saýdqa iltıpat bildirip, shaqyrǵany jáne qonaqjaılyq kórsetkeni úshin Saýd Arabııasynyń Koroli men Taq muragerine alǵys aıtty, dep habarlaıdy «Adyrna» tilshisi Aqordaǵa silteme jasap.
Qazaqstan Prezıdentiniń aıtýynsha, Memleket basshysy retinde Saýd Arabııasyna alǵash ret kelgendikten, bul sapardyń mańyzy zor.
Qasym-Jomart Toqaev Saýd Arabııasy Qazaqstannyń basty strategııalyq seriktesteriniń biri ekenin atap ótti.
– Saýd Arabııasy – Qazaqstannyń táýelsizdigin birinshi bolyp moıyndaǵan elderdiń biri. Osy kezeńde túrli baǵyttaǵy yntymaqtastyǵymyz nyǵaıa tústi. Qazir qazaq-saýd qatynastary joǵary deńgeıde. Degenmen, eki el arasyndaǵy yntymaqtastyqqa tyń serpin beretin kez keldi. Bul – elderimizdiń múddesine saı keletin ortaq sheshim. Bizdiń ózara tıimdi baılanystarymyz nyǵaıa beredi dep senemin, – dedi Memleket basshysy.
Kelissóz barysynda saýda-ekonomıkalyq jáne ınvestıııalyq yntymaqtastyq máseleleri talqylandy. Qazaqstan Saýd ınvestorlary úshin ózara múddeni kózdeıtin túrli perspektıvti salalar boıynsha erekshe sharttar men keń kólemde artyqshylyqtar usynýǵa daıyn.
Taraptar ózara taýar aınalymyn edáýir arttyrýǵa nıetti ekenin jáne jýyq arada eki el úkimetteriniń bul baǵyttaǵy jumystardy jandandyratynyn naqtylady.
Muhammed ben Salman ben Ábdelazız Ál Saýd elderimiz arasyndaǵy qatynastar deńgeıi jaqsy ekenin atap ótip, ony ári qaraı nyǵaıtyp, damytý úshin múmkindikter mol ekenin aıtty. Sondaı-aq bul baǵyttaǵy jumystardy jandandyrý qajet ekenine toqtaldy. Onyń aıtýynsha, bul rette Qazaqstan men Saýd Arabııasynyń bıznesmenderin biriktiretin Iskerlik keńestiń róli zor bolmaq.
Taq murageri Memleket basshysynyń resmı sapary aıasynda ótetin Investıııalyq dóńgelek ústelge Koroldiktiń iri kompanııalarynyń ókilderi qatysatynyn jetkizdi.
Onyń aıtýynsha, qazirgi jaǵdaıda Saýd Arabııasynyń Memlekettik ınvestıııalyq qory úılestiretin birqatar joba boıynsha birlesken jumys mańyzdy sanalady.
Muhammed ben Salman ben Ábdelazız Ál Saýd Koroldiktiń kompanııalary Qazaqstannyń agrarlyq salasyna ınvestıııa salýǵa qyzyǵýshylyq tanytyp otyr. Onyń pikirinshe, bul baǵyt jahandyq azyq-túlik daǵdarysy jaǵdaıynda asa ózekti bola túsedi.
Qasym-Jomart Toqaev Taq muragerin Qazaqstanǵa memlekettik saparmen kelýge shaqyrdy.
Muhammed ben Salman bul shaqyrýdy qýana qabyldaıtynyn aıtyp, qol jetkizilgen ýaǵdalastyqtardy júzege asyrýdyń naqty nátıjelerin talqylaý úshin Qazaqstanǵa saparmen kelýge daıyn ekenin jetkizdi.
