Ädılettılık jeŋdı - Sairagül elde qaldy

Bügın köpşılık Jarket qalasyndaǧy sot ne bolar eken dep küttı. Sonymen: "Almaty oblysynyŋ Panfilov audandyq soty Qytai azamaty, etnikalyq qazaq Sairagül Sauytbaiǧa alty ai şartty jaza kesıp, Qazaqstanda qaldyru turaly ükım şyǧardy. Sudia Dinara Qūiqabaeva Sairagül Sauytbaidy Qazaqstan şekarasyn zaŋsyz kesıp öttı dep aiyptap, alty ai merzımge bas bostandyǧynan aiyru, bıraq ony "jazasyn jeŋıldetetın erekşe jaǧdaiyna" bailanysty şartty jazaǧa almastyruǧa ükım kestı. Sudia ükım oqyǧan kezınde sot barysynda Sairagül Sauytbaidyŋ qylmysty "otbasymen qauyşu maqsatymen jasaǧany" anyqtalǧanyn, qylmysy "auyr emes" dep esepteitının aitty. Sudia Sairagül Sauytbaiǧa jaza taǧaiyndauda Qazaqstan qol qoiǧan BŪŪ-nyŋ halyqaralyq Bala qūqyqtary jönındegı konvensiiasy basşylyqqa alynǧanyn aitty. Sauytbaidyŋ etnikalyq qazaq ekenı ärı Qazaqstan azamattyǧyn aluǧa qūqyǧy bary erekşe jaǧdai retınde eskerılgen. Ükımnen soŋ Sairagül Sauytbai sot zalynan bosatyldy. Bügın tüske deiın sottyŋ jaryssöz kezeŋınde prokuror Arzygül İmiarova ony Qazaqstan aumaǧynan şyǧarmaudy, jazasyn jeŋıldetıp, sot zalynan bosatudy sūraǧan. Prokuror Sauytbaidyŋ balalary Qazaqstan azamaty ekenın, osy elde tūratynyn jäne balalarymen kezdesuın qamtamasyz etu qajettıgın aitqan. Ol osyǧan bailanysty ärı Sauytbai qylmysyn moiyndaǧandyqtan oǧan Qazaqstannan şyǧaru jazasy qoldanylmaitynyn jetkızgen. Sot tergeuı kezınde Sairagül Sauytbai özıne taǧylǧan aiypty tolyq moiyndaitynyn aityp, prokurormen prosessualdyq kelısım jasasudy sūraǧan. Ol özıne Qytaida "saiasi qysym jasalǧandyqtan şekaradan zaŋsyz ötuden özge jol qalmaǧanyn" mälımdegen. Sauytbaidyŋ sözınşe, ol Qytaida qūpiia sanalatyn "saiasi üirenu ortalyqtarynda" jūmys ıstegen, "memleket qūpiiasyn äşkerelemeu" turaly qolhat bergen. Sairagül Sauytbai Qytaiǧa qaitarylsa, ol elde özıne ölım jazasy kesıluı mümkın ekenın, Qazaqstanda qandai jazaǧa da kelısetının mälımdegen. Sairagül Sauytbaidyŋ küieuı Uäli Isläm biyl mamyrda äielın Qazaqstan Ūlttyq qauıpsızdık komitetınıŋ qyzmetkerlerı "Qorǧas keden beketın zaŋsyz būzyp öttı" degen aiyppen ūstaǧanyn habarlaǧan. Sairagül Sauytbaidyŋ küieuı Uäli Isläm men ekı balasy Qazaqstan azamattyǧyn alǧan. Erlı-zaiypty Uäli Isläm men Sairagül Sauytbai ekı balasymen bırge Qazaqstanǧa 2016 jyly köşıp kelmek bolǧan". Azattyq saity osylai dep habarlady.