Qyrǧyzstan prezidentı Sadyr Japarov medisina salasyndaǧy mamandardy daiarlau ısıne memlekettık monopoliia engızu turaly jarlyqqa qol qoidy, dep habarlaidy “Adyrna”.
Qūjatqa säikes, būl salada bılım beru qyzmetın jürgızu boiynşa erekşe qūqyq İ.K. Ahunbaev atyndaǧy Qyrǧyz memlekettık medisina akademiiasyna (QMMA) berıldı. Akademiiaǧa jüieqūrauşy joǧary oqu orny märtebesı berıldı.
Jarlyq jeke medisinalyq joǧary oqu oryndarynyŋ sanynyŋ kürt artuy men olardyŋ tülekterınıŋ daiyndyǧynyŋ tömen deŋgeiı negızınde qabyldandy. Prezidenttıŋ baspasöz qyzmetınıŋ mälımetınşe, köptegen jeke oqu oryndarynyŋ klinikalyq bazalary joq, oqytuşylardyŋ bılıktılıgı talaptarǧa sai emes, al oqu prosesı köbıne diplom berumen ǧana şektelıp, praktikalyq daiarlyq joqtyŋ qasy.
Nätijesınde jyl saiyn bılımı men täjıribesı tömen jüzdegen maman daiarlanyp, būl medisinalyq bılım beru jüiesıne degen senımge syzat tüsırıp, Qyrǧyzstan diplomynyŋ halyqaralyq märtebesıne ziian keltırude. Sonymen qatar, eldıŋ densaulyq saqtau salasynda kadr tapşylyǧy artyp keledı.
Jaŋa tärtıpke säikes, 2026 jyldyŋ 1 mausymyna deiın barlyq jeke medisinalyq joǧary oqu oryndary memlekettık akkreditasiiadan ötuge mındettı. Keiın olar QMMA-nyŋ filialy nemese qūrylymdyq bölımşesıne ainaluy mümkın. Akkreditasiiadan öte almaǧan oqu oryndary tek daiyndyq kurstary nemese QMMA jetekşılıgımen jūmys ısteitın oqu-klinikalyq baza retınde ǧana qyzmet ete alady.
Sondai-aq, 2026 jyldyŋ 1 qaŋtaryna deiın ükımet medisina jäne farmasevtika mamandyqtary boiynşa bıryŋǧai memlekettık bılım beru standarttaryn äzırlep, bekıtuı tiıs.
Sadyr Japarov būl reformalar medisina jäne farmasevtika salalary boiynşa mamandardy daiarlau jüiesın tübegeilı jaqsartuǧa, jemqorlyq täuekelderın azaituǧa, sondai-aq ūlttyq densaulyq saqtau men eldıŋ halyqaralyq bedelın qorǧauǧa baǧyttalǧanyn atap öttı.
Aita keteiık, 2022 jyldyŋ aqpanynda sol kezdegı densaulyq saqtau ministrı Alymqadyr Beişenaliev Qyrǧyzstanda 24 medisinalyq oqu orny bar ekenın habarlaǧan. Onyŋ ışınde üş memlekettık oqu orny: QMMA, Oş memlekettık universitetınıŋ medisina fakultetı jäne Qyrǧyz-Resei Slavian universitetınıŋ fakultetı. Qalǧan 21 oqu orny turaly ministr olardy "şeneunıkter nemese aqşasy bar adamdar" ielenıp otyr dep mälımdegen. Sol kezde ol 17 jeke medisinalyq joǧary oqu ornyn jabu nietın de bıldırgen, sebebı olar talaptarǧa säikes kelmeitın bolǧan.
BAQ derekterıne qaraǧanda, jeke medisinalyq universitetterde oqityndardyŋ basym bölıgı — Oŋtüstık-Şyǧys Aziia men arab elderınıŋ azamattary. 2020 jyly Päkıstan Qyrǧyzstandaǧy barlyq medisinalyq joǧary oqu oryndaryn qara tızımge engızıp, öz azamattaryna būl oqu oryndaryna tüspeuge keŋes bergen. Sebebı qyrǧyz diplomymen oqyǧan päkıstandyqtardyŋ 90 paiyzy öz elındegı medisinalyq keŋestıŋ emtihanynan öte almaǧan jäne olardyŋ diplomdary Päkıstanda jaramsyz dep tanylǧan.
