Qazaq medisinasyndaǧy körnektı tūlǧa, akademik Töregeldı Şarmanovtyŋ 95 jyldyǧyna orai S. Asfendiiarov atyndaǧy Qazaq ūlttyq medisina universitetınde ǧalymnyŋ aty berılgen erekşe auditoriia men daŋq zaly aşyldy, dep habarlaidy "Adyrna" ūlttyq portaly Tengrinews.kz-ke sıltep.
Jaŋartylǧan akt zalynda aşylǧan Töregeldı Şarmanovtyŋ daŋq zalynda respublikalyq jäne halyqaralyq deŋgeidegı konferensiialar, forumdar men kezdesuler ötkızu josparlanyp otyr.
Saltanatty şara aiasynda Töregeldı Şarmanov atyndaǧy halyqaralyq marapat ta tabystaldy. Biylǧy marapat iegerı — medisina ǧylymdarynyŋ doktory, professor Maqsūt Qūljanov. Ol mınberge baiandama jasau üşın şyqqanda, syilyq kütpegen jerden tabys etıldı.
«Eŋbegımnıŋ joǧary baǧalanǧanyna rizamyn. Būl - men üşın ülken märtebe», — dedı professor marapat alu sätınde.
Maqsūt Qūljanov — ūzaq jyldar boiy Düniejüzılık densaulyq saqtau ūiymynyŋ atqaruşy komitetınıŋ müşesı bolyp, beiinfeksiialyq aurulardyŋ ekonomikaǧa äserı men jahandyq densaulyq saqtau mäselelerın zerttegen belgılı ǧalym.
Aita keteiık, Töregeldı Şarmanov — 1978 jyly Almatyda ötken DDSŪ konferensiiasynda qabyldanǧan äigılı Almaty deklarasiiasynyŋ bastamaşysy, ärı qazaqstandyq medisinany halyqaralyq deŋgeige kötergen tūlǧa.
19 qazanda Qazaq taǧamtanu akademiiasynyŋ prezidentı, medisina ǧylymdarynyŋ doktory, professor, körnektı ǧalym Töregeldı Şarmanovtyŋ tuǧanyna 95 jyl tolǧanyn habarlaǧan edık.
