Almaty qalasy Bostandyq audanynyŋ äkımı bolyp Azamat Qaldybekov taǧaiyndaldy. Būl turaly qala äkımdıgınıŋ baspasöz qyzmetı jazdy, dep habarlaidy «Adyrna» tılşısı.
"Almaty äkımı Darhan Satybaldynyŋ ökımımen, Prezident Äkımşılıgınıŋ jäne qalalyq mäslihattyŋ kelısımımen Bostandyq audanynyŋ äkımı bolyp Azamat Qaldybekov taǧaiyndaldy", - delıngen habarlamada.
Būǧan deiın ol Almaty äkımınıŋ orynbasary qyzmetın atqarǧan edı.
Azamat Qaldybekov 1984 jyly 11 qazanda düniege kelgen. Äl-Farabi atyndaǧy Qazaq ūlttyq universitetın «Halyqaralyq qūqyq» mamandyǧy boiynşa bıtırgen, Bolaşaq baǧdarlamasy boiynşa Diuk universitetınde (Soltüstık Karolina, AQŞ) qūqyq magistrı därejesın alǧan, Qazaq ūlttyq agrarlyq zertteu universitetınde filosofiia doktory (Phd) ǧylymi därejesın alǧan.
Eŋbek jolyn 2007 jyly Almaty qalasy Bostandyq audany №2 audandyq sotynyŋ jetekşı mamany qyzmetınen bastaǧan. Är jyldary QR Ūlttyq bankı, «Samūryq-Qazyna» AQ, «Azamattarǧa arnalǧan ükımet» memlekettık korporasiiasy» KEAQ qūrylymdarynda jūmys ıstegen.
2018 jyly Almaty qalasy äkımınıŋ bas inspektory bolǧan. 2018 jyldyŋ şıldesınen 2019 jyldyŋ nauryzyna deiın Almaty qalasy Jetısu audany äkımı apparatynyŋ basşysy qyzmetın atqarǧan. 2019 jyldyŋ nauryz-qazan aralyǧynda Almaty qalasy jer qatynastary basqarmasy basşysynyŋ orynbasary bolyp eŋbek etken. 2020 jyldyŋ qaŋtaryna deiın Almaty qalasy Jasyl ekonomika basqarmasy basşysynyŋ orynbasary qyzmetın atqarǧan. 2020-2024 jyldary Almaty qalasy Alatau audanynyŋ äkımı bolǧan.
