Kievtegı Äzerbaijan elşılıgıne jasalǧan zymyrandyq şabuyl halyqaralyq qoǧamdastyqtyŋ nazaryn audardy, dep habarlaidy "Adyrna" ūlttyq portaly.
Äzerbaijan prezidentı İlham Äliev Ukraina prezidentı Vladimir Zelenskiimen telefon arqyly söilesıp, būl ärekettı qatty aiyptady. Prezident halyqaralyq qūqyq normalaryna säikes diplomatiialyq mekemelerge şabuyl jasau mülde qabyldanbaitynyn atap öttı.
14 qaraşada Äzerbaijan syrtqy ıster ministrlıgı Bakudegı Resei elşısı Mihail Evdokimovty şaqyryp, resmi nota tapsyrdy. Ministrlık habarlauynşa, "Eskendır" tiptı zymyran elşılıktıŋ aumaǧyna tigen. Nätijesınde aumaqtyŋ bır bölıgı tolyq qirap, qyzmettık kölıkter, äkımşılık ǧimarat jäne konsuldyq bölım zaqymdandy. Äzerbaijan tarapy būl oqiǧany aiyptap, halyqaralyq qūqyq normalaryna qarsy dep mälımdedı.
BŪŪ Bas hatşysy Antoniu Guterriş şabuylǧa qatty narazylyq bıldırıp, diplomatiialyq nysandardyŋ qorǧaluy qajet ekenın eske saldy. Baspasöz hatşysy Stefan Diujarrik habarlaǧandai, şabuyldar saldarynan Kievte kemınde alty adam, Chernomorsk qalasynda ekı adam qaza tauyp, köptegen beibıt tūrǧyndar zardap şektı. Sonymen qatar tūrǧyn üiler, energetikalyq infraqūrylym jäne Äzerbaijan elşılıgı zaqymdandy.
«Būl şabuyldar halyqaralyq gumanitarlyq qūqyqty būzady. Beibıt tūrǧyndarǧa jäne azamattyq infraqūrylymǧa jasalǧan kez kelgen şabuyl qabyldanbaidy. Qaqtyǧystar dereu toqtatyluy tiıs», — dedı Diujarrik.
Bas hatşy Ukrainadaǧy ädılettı jäne tūraqty beibıtşılıkke jetu üşın tolyq, bırden jäne şekteusız atysty toqtatuǧa şaqyrady. Sonymen qatar, ol Ukraina suverenitetı, täuelsızdıgı jäne territoriialyq tūtastyǧyn halyqaralyq tanylǧan şekaralar şeŋberınde saqtaudy qoldaitynyn aitty.
