Prezident Qasym-Jomart Toqaev Türkımenstan basşysyn «Altyn Qyran» ordenımen nagradtady, dep habarlaidy «Adyrna» ūlttyq portaly Aqordaǧa sılteme jasap.
Astanada ötken saltanatty räsım barysynda Memleket basşysy Serdar Berdımūhamedovtıŋ jaŋa formasiiadaǧy bedeldı memleket qairatkerı, eldıŋ memlekettık negızderın, äleumettık-ekonomikalyq äleuetın jäne halyqaralyq bedelın nyǧaituǧa eleulı üles qosyp jürgen progressivtı de myqty lider ekenın atap öttı.
Prezident Toqaevtyŋ aituynşa, Türkımenstan basşysy ūlttyq lider – Gurbanguly Berdımūhamedov josparlaǧan bolaşaqqa baǧyttalǧan strategiialyq kursty tabysty jalǧastyryp keledı.
«Sızdıŋ dana basşylyqpen Türkımenstan ekonomikasynyŋ qarqyny artyp, önerkäsıp, kölık infraqūrylymy, energetika salasy jaŋaryp jatyr. Äleumettık jobalar josparly türde jüzege asyp, ǧylym men bılım salasy damuda. Halyqtyŋ äl-auqaty artyp keledı. Būl jetıstıkterıŋız eŋ joǧary baǧalauǧa laiyq», — dedı Prezident Toqaev.
Memleket basşysy, äsırese, Aşhabadtyŋ halyqaralyq diplomatiia, beibıtşılık pen tūraqtylyq ortalyǧy retındegı rölın küşeituge baǧyttalǧan bastamalardy atap öttı. Būǧan BŪŪ Bas assambleiasy qoldaǧan 2025 jyldy Halyqaralyq beibıtşılık pen senım jyly dep jariialau bastamasy naqty dälel ekenın jetkızdı.
Qazaqstan Prezidentı ekı el arasyndaǧy dostyq pen strategiialyq serıktestıktı nyǧaitudaǧy Serdar Berdımūhamedovtıŋ jeke eŋbegın erekşe atap öttı.
«Qazaq–türkımen qatynastarynyŋ bolaşaǧy zor ekenıne senımdımın. Bügıngı kelıssözderdıŋ nätijelerı osynyŋ aiqyn dälelı. Qol jetkızılgen uaǧdalastyqtar köpjaqty yntymaqtastyǧymyzǧa jaŋa serpın beredı», — dedı Qazaqstan Prezidentı.
Öz kezegınde Serdar Berdımūhamedov Memleket basşysyna joǧary memlekettık marapat üşın alǧys bıldırdı.
«Būl nagrada – Türkımenstan halqyna körsetılgen zor qūrmettıŋ belgısı. Halyqtarymyzdy ǧasyrlar boiy dostyq pen tatu körşılık bailanystyrady. Ekı eldıŋ halyqaralyq arenadaǧy tyǧyz jäne nätijelı yntymaqtastyǧy – joǧary deŋgeidegı özara tüsınıstık pen qoldaudyŋ körınısı», — dedı ol.
"Altyn Qyran" ordenımen būryn Serdar Berdımūhammedovtıŋ äkesı Gurbanguly Berdımūhammedov te marapattalǧan bolatyn. Biyldyŋ özınde osy ordenmen Armeniia premerı Nikol Paşinian, Mäskeu jäne bükıl Resei patriarhy Kirill jäne Qyrǧyzstan prezidentı Sadyr Japarov marapattaldy.
