Foto: Reuters
Bolgariialyq änşı Dara 516 ball jinap, «Eurovidenie» än baiqauynyŋ 70-şı mereitoilyq kezeŋınde jeŋıske jettı. Ol qazylar alqasynyŋ da, körermender dauys beruınıŋ de qorytyndysy boiynşa bırınşı orynǧa ie bolyp, ekınşı oryn alǧan izraildık änşı Noam Bettandy artta qaldyrdy, dep habarlaidy "Adyrna" ūlttyq portaly VVS-ge sıltep.
Baiqau nätijesınde İzrail körermender dauys beruınde 343 ball jinap, ūzaq uaqyt boiy köş basynda tūrǧan. Alaida qazylar alqasynyŋ soŋǧy nätijelerı jariialanǧannan keiın jalpy esepte Bolgariia alǧa şyqty.
Jeŋımpaz Dara BBC-ge bergen sūhbatynda özınıŋ «Bangaranga» atty änı ömırge degen senım men optimizmdı bıldıretının atap öttı. Onyŋ aituynşa, ännıŋ negızgı ideiasy – «bärı mümkın jäne bärı jaqsy bolady» degen oidy jetkızu.
Biylǧy baiqau aiasynda İzraildıŋ qatysuyna bailanysty bırqatar elder «Eurovideniege» boikot jariialady. Olardyŋ qatarynda İspaniia, Niderland, İrlandiia, İslandiia jäne Sloveniia bar.
İzrail atynan şyqqan Noam Bettan sahnaǧa alǧaşqylardyŋ bırı bolyp şyǧyp, «Michelle» atty änın ūsyndy. Aǧylşyn, fransuz jäne ivrit tılderınde oryndalǧan kompozisiia körermender tarapynan aralas reaksiiaǧa ie boldy: bır bölıgı qoldau bıldırse, endı bır bölıgı narazylyq tanytty.
Ūlybritaniia biyl soŋǧy oryndy ielendı. Sem Bettl (sahnalyq aty –Look Mum No Computer) tek Ukraina qazylar alqasynan bır ball alyp, körermender dauys beruınen nöl ball jinady. Degenmen būl Ūlybritaniianyŋ baiqaudaǧy eŋ naşar nätijesı emes — 2021 jyly el mülde ūpaisyz qalǧan bolatyn.
Biylǧy baiqaudyŋ basty favoritı retınde findık duet Linda Lampenius pen Pete Parkkonen ataldy. Sonymen qatar üzdık üştıkke grek oryndauşysy Akilas (Akilas Mitilineos) jäne avstraliialyq änşı Delta Gudrem de kırdı.
Qorytyndy nätijede Finliandiia altynşy orynǧa, Avstraliia törtınşı orynǧa, al Gresiia onynşy orynǧa tūraqtady.
Bes el «Eurovidenie-2026» än baiqauyna qatysudan bas tartqany belgılı. Būl şeşımge İzraildıŋ baiqauǧa qatysuyna rūqsat berıluı sebep bolǧan. Boikot turaly şeşımdı İspaniia, İrlandiia, Niderland, İslandiia jäne Sloveniianyŋ ūlttyq habar taratuşylary jariialady. İspaniianyŋ radio jäne televiziia korporasiiasynyŋ töraǧasy Hose Pablo Lopes boikottyŋ sebepterı turaly: «Eurovidenie» än baiqauyn ūiymdastyruşylardyŋ bırı retınde bız ortaq jauapkerşılık arqalaimyz. İzrail baiqauǧa tūraqty türde qatysyp kelgenımen, qazırgı oqiǧalar men qazır bolyp jatqan genosidke köz jūma qarau bız üşın mümkın emes», - degen.
