Áskerde boryshyn ótep júrgen qyz komandırler tarapynan qysym kórgenin aıtty, dep jazady "Adyrna" ulttyq portaly.
Tengrinews.kz habarlaýynsha, Almaty oblysy Sheńgeldi eldi mekenindegi 54179 áskerı bóliminde boryshyn ótegen qyz "NeMolchıKz" qoǵamdyq qoryna júginen. Ol 2019 jyldyń jeltoqsanynda úsh jyl merzimge qyzmetke shaqyrylǵanyn, biraq merziminen buryn bosatylǵanyn aıtty. Áskerı qyzmetshi batalon komandırleri kelisimshart boıynsha qyzmet etýge kedergi keltirgenin aıtty.
Qyzdyń aıtýynsha, áskerı bólimde qyzmet ete bastaǵan sátten-aq batalon komandıri qyr sońyna túsip, qysym kórsetken.
"Oǵan baǵynyshty ofıerler eshteńeni baıqamaǵandaı túr tanytyp, al áskerı bólim qolbasshylyǵy (...) eshqandaı shara qoldanbady", - deıdi qyz.
Onyń aıtýynsha, ol áskerı bólim basshylyǵyna birneshe ret júgingen. Biraq: "Ádemi qyzsyń, jeke ómirińe aralaspaımyz, men seniń aǵań emespin, komandırdi tańdamaıdy, seni eshkim áskerge qolyńnan súırep ákelgen joq", - degen jaýap alǵan.
Qyz psorıaz jáne gastrıtpen áskerı gospıtalǵa túskenin aıtty. Onyń aıtýynsha, batalon komandıri basqa bólimshege aýystyrylǵan, al batalon komandıriniń ornyna onyń jaqyn dosy kelgen. Ol osydan keıin jábirleý, qorlaý, qysym kóbeıe túskennin aıtty.
Qyz áskerden ketken. Ol múgedek anasy men inileriniń jalǵyz asyraýshysy, ákesi joq ekeni aıtyldy. Ol ózin qorlaǵandarǵa shara qoldanýdy suraǵan.
Qorǵanys mınıstrligi ókilderi shuǵyl komıssııa qurylǵanyn, ol áskerı bólimge baryp, oqıǵany egjeı-tegjeıli zertteýge kiriskenin málimdedi.
"Qatardaǵy Elshibaevanyń áleýmettik jelide jarııalaǵan derekteri rastalsa, kináliler jumystan bosatylyp, qylmystyq is qozǵalǵanǵa deıin qatań tártiptik jaýapkershilikke tartylady. Tergeý barysy qorǵanys mınıstriniń jeke baqylaýyna alyndy", - dedi vedomstvo ókilderi.
"Adyrna" ulttyq portaly
