Käsıpker, bloger ärı Respublica partiiasynyŋ belsendı ökılderınıŋ bırı Beibıt Älıbekov äkesı Baqyt Älıbekovtıŋ Facebook paraqşasynda jariialanǧan dauly jazbalaryna qatysty pıkır bıldırdı, dep habardaidy "Adyrna".
Soŋǧy uaqytta äleumettık jelıde Baqyt Älıbekovtıŋ qazaq halqyna qatysty «qazanbastar», «mämbet» sekıldı kemsıtuşılık sipattaǧy sözder qoldanylǧan, sondai-aq Nauryz meiramyna qatysty ötkır pıkır aitylǧan jazbalary qyzu talqylanuda.
Osyǧan bailanysty Beibıt Älıbekov Threads platformasynda pıkır bıldırıp, äkesınıŋ közqarastaryn eşqaşan qoldamaǧanyn atap öttı.
«Barlyǧymyz ata-anany taŋdamaimyz, olar da bızdı taŋdai almaityny anyq. Äkemnıŋ közqarastary men pıkırlerın eşqaşan qoldaǧan emespın jäne būl turaly bırneşe ret aşyq aittym», – dep jazdy ol.
Beibıt Älıbekovtıŋ aituynşa, äkesı ekeuı – jeke ūstanymy men jauapkerşılıgı bar ekı bölek tūlǧa. Sondyqtan är adam öz sözderı men äreketterıne ǧana jauap beruı kerek.
«Balasy äkesınıŋ aitqan sözı nemese jasaǧan äreketı üşın jauap beruge tiıs emes dep oilaimyn. Sanaly, jasy kelgen adamnyŋ pıkırı üşın menıŋ aqtaluǧa mındetım joq. Menıŋ öz pıkırım, öz ömırım jäne öz jauapkerşılıgım bar. Sol üşın tolyqtai jauap beruge daiynmyn», – dedı ol.
Ol ata-ana men balanyŋ jeke tūlǧa retınde bır-bırınen täuelsız ekenın jäne ärkımnıŋ öz közqarasy üşın özı jauap beruı qajet ekenın atap öttı.
