AQŞ prezidentı Donald Tramp äkımşılıgı barlyq amerikalyq elşılık pen konsuldyqtarda vizalyq sūhbattarǧa jazyludy uaqytşa toqtatty, dep habarlaidy «Adyrna» tılşısı Reuters-ke sılteme jasap.
Agenttık mälımetınşe, AQŞ Memlekettık departamentı konsuldyq qyzmetkerlerge arnalǧan jahandyq oqytu baǧdarlamasyn ıske qosqan. Baǧdarlama aiasynda mamandar vizalyq ötınış beruşılerdı jan-jaqty ärı bırızdı baǧalauǧa jäne äleumettık tölemderge täueldı boluy yqtimal tūlǧalardy anyqtauǧa üiretılmek.
İmmigrasiialyq vizaǧa ötınış bergen keibır azamat taǧaiyndalǧan sūhbattarynyŋ keiınge şegerılgenı turaly habarlama alǧan. Vizalyq qabyldaulardyŋ qaşan qaita bastalatyny äzırge belgısız.
Sonymen qatar Tramp äkımşılıgı B1/B2 sanatyndaǧy (turistık jäne ıskerlık) 200 myŋǧa deiıngı vizany jappai kerı qaitaryp alu mäselesın qarastyryp jatyr. AQŞ Memlekettık departamentınıŋ ökılı Tommi Pigottyŋ aituynşa, būl şara 2016–2026 jyldary atalǧan vizalardy alyp, keiınnen AQŞ-tan baspana sūraǧan nemese sūrap jatqan şetel azamattaryna qatysty boluy mümkın. Eger būl şeşım jüzege assa, ol AQŞ tarihyndaǧy vizalardy eŋ auqymdy bır rettık kerı qaitaryp alu oqiǧalarynyŋ bırıne ainaluy yqtimal.
Būǧan deiın federaldyq sudia 75 el azamatyna immigrasiialyq viza beruge qoiylǧan şekteudı zaŋsyz dep tanyp, onyŋ küşın joiǧan bolatyn. Sot äkımşılıktıŋ öz ökılettıgın asyra paidalanǧan degen qorytyndyǧa kelgen.
