2020 jyldyń basynda qatty naýqastandym. Bir jylǵa jýyq ýaqyt jumystan da, qoǵamnan da shettep kettim. Shynymdy aıtsam, ómir úshin kúrestim.
Sol ýaqytta Baıan úıge kelip: «Tureke, siz aýyryp jatyrsyz ǵoı, men jumysty júrgize bereıin, keıin siz jazylǵanda bárin ákep óz qolyńyzǵa tapsyramyn, «Qara shańyraq» maǵan amanat»,-dep mórdi, quryltaıshylyq qujattardy úıden alyp ketti. Shynymdy aıtsam, aýyr em, aýyr dári qatty áser etip, durys túsinetinde jaǵdaıda emes edim. Keıin betim beri qarap, ómirge orala bastadym. Sol kezde Baıanmen habarlassam, telefon kótermeıdi, mennen qashqaqtaıdy. Feısbýktegi, ınstagramdaǵy dostyqty buǵattap tastaǵan. Ózara aralasatyn, jaqsy syılaıtyn bir apaıǵa habarlasyp qoıamyn. Ol kisiniń ózi de, sózi de ózgergen.Aralasyp júrgen jandardyń ózi basqasha sóıleıdi. Barlyǵy mennen qashady. Sóıtip júrgende quryltaıshylyqtaǵy bir kelinshek habarlasyp: sizdi «Qara shańyraqtyń» Astanadaǵy fılıalyna basshy etpek deıdi. Qalaı? Qaıdaǵy fılıal? Nege? Ózim qurǵan qoǵamdyq birlestiktiń basshysy bolýǵa laıyq emespin be? «Qara shańyraqty» dál mendeı uǵynyp, ony túpki maqsatyna jetkize ala ma olar? Sol kezde aǵamnan aıyrylyp, súıegi shetelde qalyp, qaıǵydan qan jutyp júrgen kezim edi. Túk túsinbedim. Odan keıingi áńgimeni maǵan aıtý óte aýyr. Búginde respýblıkalyq Analar keńesin basqaryp otyrǵan Názıpa Shanaı maǵan habarlasyp: Turar, aǵań ómirden ozypty, sháıǵa shaqyramyn dedi. Qazaqtyń kóńilshaıy bolar dep aıtqan mekenjaıyna keldim. Birer mınýttan soń Baıan men taǵy bir apaı keldi. Bir ýaqytta Názıpa Ydyrysqyzy áńgimeni bastap: biz «Qara shańyraqtyń» keńes músheleri sheshtik, endi Qoǵamdyq birlestiktiń tóraıymy Baıan bolady dedi. Men aldymda qarsy otyrǵan Baıanǵa qarap: Baıan, myna kisiler ne aıtyp otyr? «Qara shańyraqty» qurǵan kezde bul kisiler bolǵan joq edi, sen amanat dep alyp ediń ǵoı-dedim. Sol kezde Baıan tómen qarap úndemedi. Shynymdy aıtsam, sol kezde kimmen, qalaı sóıleskenim, bárin eske alý men úshin óte aýyr. Odan keıin 3 aı úıden shyqpaı, tósek tartyp jatyp qaldym.
Toqeteri. Baıan Ahataı «Qara shańyraq» qoǵamdyq birlestigine qaıta tirketý jasatyp, ózi Tóraıym bolyp alady.
Meniń úıime tirkelgen Qoǵamdyq birlestikti óziniń balabaqshasynyń mekenjaıyna tirketedi. Meniń usynysymmen saılanǵan quryltaıshylardyń barlyǵyn-derik shyǵaryp tastaıdy da, óziniń sózin sóıleıtinderdi saılaıdy. Quryltaıshylyq qujattardyń bárine meniń atymnan jalǵan qol qoıyp, Qoǵamdyq birlestikti qaıta tirketedi. «Qara shańyraq degen kıeli uǵym. Is qozǵaý bolmas. Qazaqtyń qyzy ǵoı, uıat bolar. Bir habarlasar», -dep 9 aı kúttim. Biraq habarlaspaq túgili telefonymdy da almaıtyn. Meni qaralaǵan neshe túrli áńgimeler jetip jatty. Ózara tanystar habarlasyp, sen sóıtipsiń ǵoı, men jaıly búıtipsiń degen renishterinde bildirip jatty. Aqtaldym. Aıtpadym dedim. Jyladym. Qınaldym. Sonda da janymda júrgen sińlimdeı qyz edi ǵoı dep, jamandyqqa qımadym. Sonda da bir kúni habarlasar degen úmitimdi úzbedim. «Apaı, mundaı adamdar eshteńeden taıynbaıdy. Aldyndaǵysyn taptap ótedi. Siz qyzyqsyz. Ol siz qatty aýyryp jatqan kezińizde satqyndyq jasady, sizdi jylatty. Erteń taǵy bireýdi jylatady. Bulaı bolmaıdy. «Qara shańyraǵyńyzdy» qaıtaryp alyńyz,-degen janashyr jandardyń qoldaýymen, osy jyldyń 18 maýsymynda Saryarqa aýdandyq Ishki ister organyna aryz tastadym. Sodan beri mine, eki aıdan astam ýaqyt ótti. Is tapsyrylǵan anyqtaýshy meni búgin ǵana shaqyrdy. Onyń ózinde ózim qaıta-qaıta habarlastym. Shyn máninde bul istiń sozylýyna, sosyn merzimi jetip, «qylmys quramy tabylmady» dep jabylýyna múddeli yqpaldy adamdar bar ekenin sezemin.
Olardyń maǵan qarsy jasap jatqan shabýylyna da, meni barlyq jerge jamandap, tipti janymdaǵy adamdardy da menen alystatý úshin barlyǵyn jasap, tipti «Qara shańyraq» ujymy maýsymda uıymdastyrǵan eń mańyzdy is-sharamnyń ótkizilmeı qalýy úshin, aıaqtan shalyp jatqanyna da osy kúnge deıin, qazaqshylyqqa salynyp, qoı, uıat bolar, qoıar dep úndemeı kelemin.
Tipti qalalyq deńgeıdegi bir komıssııaǵa eki jyl qatarynan múshe bolǵan edim. Ol múshelikten shyǵaryp tastaýǵa da «yqpaldynyń» qoly tıgenin bildim. Áıtpese, osy Astanada ulttyq qundylyqty dáriptep, balalarmen jumys istep júrgen mendeı adamdy «jumys istemedi» dep shyǵara ma? Shydamnyń da shegi bar eken. Búgin aıtpasam, bul istiń toqtap qalǵaly turǵanyna kózim jetti. Sondyqtan Saryarqa Ishki ister bóliminde qaralyp jatqan is toqtap qalmasyn degen úmitte jazýǵa májbúr bolyp otyrmyn, aǵaıyn. Sóge jamandamańyzdar. Osy eki jyl ishinde meniń basymnan keshken jaǵdaıdy, men kótergen synaq pen aýyrtpalyqty eshkimniń basyna bermesin. Qoǵamdyq birlestik qolymda bolmaǵandyqtan, qanshama nárse joǵalttym. Osy zańsyz istiń artynda QR Premer-mınıstri Eraly Toǵjannyń keńesshisi, Qazaq halqy Assambleıasy janyndaǵy Analar keńesiniń tóraıymy, Prezıdent janyndaǵy Áıelder isteri jáne otbasylyq demografııalyq saıasat jónindegi Ulttyq komıssııanyń múshesi Nazıpa Shanaıdyń turǵanyna senimdimin.
Jańa Qazaqstan deımiz. Jańa Respýblıka deımiz. Ádildik deımiz. Ádildik aýyly alys pa dep qalamyn.
Búginde Baıan Ahataıdy janyna ertip alyp, respýblıkany aralap, ana, bala, urpaq máselesin kóterip júr. Baıan Ahataı «Amanat» partııasynyń respýblıkalyq bir keńesine múshe eken. Jaqynda Bilim muǵalimderdiń tamyz konferenııasynda ózi múshe bolyp tabylmaıtyn, «Qazaq halqy Assambleıasy» janyndaǵy Analar keńesiniń, dálirek aıtqanda, onyń tóraıymy Názıpa Shanaıdyń atynan urpaq tárbıesine qatysty «tamasha» sózder aıtyp otyrǵanyn kórdim. Amanatqa qııanat jasaǵan jannyń urpaq tárbıesine qatysty sóz aıtýǵa qandaı qaqy bar? Aıdyń kúnniń amanynda bireýdiń ıdeıasyn urlap, tartyp alyp, reıderlikpen aınalysyp júrgen adamdar qalaı elge aqyl aıtyp, ónege kórsetpek?
Qurmetti aǵaıyn, bul meniń jan aıǵaıym. Bastysy, «Aqqa Qudaı jaq bolyp», yqpaldylardyń aralasýymen qozǵalǵan is toqtap qalmasyn. Óıtkeni maǵan satqyndyq jasaǵan jan kúni erteń basqasyna da satqyndyq jasap, basqa bireýdi jylatpasyna kim kepil?!. Men tózimdimin, qıyndyqqa synbadym. Tizerlep qalsam da, jyǵylmadym. Qaıta turdym. Al basqa adam mundaı synaqqa tóze ala ma eken?!", - dep jazdy Turar Sáttarqyzy.
"Adyrna" ulttyq portaly
