Äleumettık jelıler men messendjerlerde 2023 jyldyŋ basynda Qazaqstan ŪQŞŪ-ǧa müşelıgın toqtatyp qoiudy josparlap otyrǧany turaly habarlama tarady. Taralǧan aqparatta müşelıkten şyǧu turaly resmi mälımdeme bırınşı qaŋtarda jasalatyny aitylǧan. Būl jalǧan bolyp şyqty, dep habarlaidy «Adyrna» tılşısı stopfake.kz-ke sılteme jasap.
QR Syrtqy ıster ministrlıgı būl aqparatty joqqa şyǧardy.
– Qazaqstannyŋ ŪQŞŪ-dan şyǧuy turaly jekelegen äleumettık jelılerde taraǧan aqparat – feik jäne şyndyqqa janaspaidy. Qazaqstan ŪQŞŪ qūrylǧaly oǧan müşe, osy ūiymnyŋ belsendı qatysuşysy bolyp tabylady. ŪQŞŪ-ǧa müşe bolu elımızdıŋ ūlttyq müddelerıne tolyq sai keledı. Ūjymdyq qauıpsızdık turaly şartta oǧan qatysuşy memleketter üşın, onyŋ ışınde Qazaqstan üşın de qauıpsızdıktı qamtamasyz etuge zaŋdy türde mındetteitın kepıldıkter közdelgen. Būdan basqa, ŪQŞŪ şeŋberınde halyqaralyq terrorizmge, zaŋsyz köşı-qonǧa, esırtkınıŋ zaŋsyz ainalymyna, transşekaralyq qylmystylyqqa, aqparattyq saladaǧy qaterlerge bırlesıp qarsy ıs-qimyl jasau daǧdylary pysyqtalady. Iаǧni, ŪQŞŪ aiasyndaǧy yntymaqtastyq Qazaqstannyŋ syrtqy saiasatynyŋ maŋyzdy baǧyty bolyp tabylady, elımızdıŋ ŪQŞŪ-ǧa qatysuy Qazaqstannyŋ ūzaq merzımdı strategiialyq qūjattarynda qarastyrylǧan. Jalpy, Qazaqstan Ūjymdyq qauıpsızdık turaly şart ūiymynan şyǧu mümkındıgın qarastyryp jatqan joq,-dep habarlady vedomstvonyŋ baspasöz qyzmetı.
