Ashat Aımaǵambetov: Ustaz - arnaıy aǵartýshylyq mıssııa

1428

Oqý-aǵartý mınıstri Ashat Aımaǵambetov qazaqstandyq ustazdardy kásibı merekesimen quttyqtady, dep habardaıdy “Adyrna” ulttyq portaly.

«Qymbatty áriptester!

Sizderdi kásibı merekemen shyn júrekten quttyqtaımyn!

Ustaz – ol tek mamandyq qana emes, sonymen birge arnaıy aǵartýshylyq mıssııa. Sizder kún saıyn balalardy bilim nárimen sýsyndatyp, olardyń daryndaryn ashýǵa, durys qundylyqtardy boılaryna sińirýge kómektesesizder.

Búgingi kúni elimizdegi bilim berý júıesi – 500 myńǵa jýyq ustazymyz eńbek etetin úlken sala.

Qasym-Jomart Kemeluly Toqaev Prezıdent bolyp saılanǵannan keıin birden muǵalimder korpýsyn qoldaý úshin barlyq sharany qabyldaýdy tapsyrdy.

Osylaısha 2019 jyly «Pedagog mártebesi týraly» zań qabyldanyp, muǵalimderdi shamadan tys esep berýden, mindetine jatpaıtyn fýnkııalardan bosatýǵa jaǵdaı jasaldy. Biliktilik sanaty, magıstratýra, synyp jetekshiligi, dápter teksergeni jáne t.b. úshin ár túrli qosymsha tólemder engizilip, olardyń kólemi ulǵaıtyldy.

Sonymen qatar Memleket basshysynyń sheshimderi arqasynda muǵalimderdiń jalaqysy birneshe jyldan beri jyl saıyn 25%-ǵa kóterilip keledi.

Bıyl 25 jyldan astam eńbek etken barlyq ustazǵa arnaıy marapat taǵaıyndadyq. Óıtkeni óz isine osynsha jyl adal qyzmet etken mamandar erekshe qurmet pen qoldaýǵa laıyq.

Sonymen qatar 30 jyldan astam pedagogıkalyq tájirıbesi bar muǵalimderdi sanattar men aı saıynǵy qosymsha tólemder alý úshin tapsyratyn testten bosatý týraly sheshim qabyldadyq.

Qyrkúıek aıynan bastap el mektepteriniń basym kópshiligi bes kúndik oqý aptasyna aýysty. Sondyqtan osy mektepterdiń muǵalimderine senbini qosymsha demalys kúni retinde berýdi jón kórdik. Endi ózderińizge jáne jaqyndaryńyzǵa kóbirek kóńil bóle alasyzdar.

Kelesi jyly qańtar aıynan bastap mektep, kolledj jáne qosymsha bilim berý uıymdaryndaǵy barlyq pedagogtiń jalaqysy taǵy 25%-ǵa ósedi», – dedi mınıstr.

Onyń aıtýynsha, sondaı-aq kelesi jyly el Prezıdentiniń tapsyrmasy boıynsha balabaqshalardaǵy barlyq tárbıeshiniń jalaqysy ósedi.

«Biz bul baǵyttaǵy jumysty toqtatpaı, budan da qolaıly jaǵdaı jasaýdy jalǵastyra beremiz.

Qadirli áriptester!

Pandemııa kezinde de ózderińizdi laıyqty kórsete bildińizder. Kóptegen ata-ana sizderdiń jumystaryńyzdyń qanshalyqty jaýapty jáne qıyn ekenin taǵy bir márte túsindi. Al balalar muǵalimniń meıirimdi kózqarasy, jyly sózi, onyń kómegi qanshalyqty mańyzdy ekenin sezindi.

Men qala jáne aýyl mektepterine barǵanda áriptesterimmen áńgimeleskendi unatamyn.

Sizderdiń bilim salasyna sińirip jatqan qajyrly eńbekterińizdi kórip, isterińizge degen súıispenshilikterińiz jáne adaldyqtaryńyz úshin alǵysymdy bildirgim keledi. Sizderge zor densaýlyq, baqyt, isterińizge bereke jáne shańyraqtaryńyzǵa amandyq tileımin!

Merekelerińizben, qurmetti áriptester!

Ustazdar kúni qutty bolsyn!», – dep jazdy mınıstr Telegram kanalynda.

Pikirler
Uqsas jańalyqtar