Kıbershabýyldardy arnaıy júıeler jasap jatqanyn Aqparat jáne qoǵamdyq damý mınıstri Darhan Qydyráli aıtty. Mınıstr bul týraly Qazaqstan ulttyq arnasynyń Apta baǵdarlamasyna bergen suhbaty barysynda málimdedi, dep habarlaıdy “Adyrna” ulttyq portaly.
Aıta keteıik, Abaı oblysyna sapary kezinde Memleket basshysy kıbershabýyldar kóbeıip ketkendigi týraly aıta ketken edi. Vedomstvoǵa kelgenine bir aı bolǵan mınıstr Darhan Qydyráli de osyǵan qatysty óz pikirin bildirdi.
“Jalpy ǵalymdar «postshyndyq» dep ataǵan osy kezeńde gıbrıdtik soǵys álemde órship tur. Mundaı myltyqsyz maıdan kezinde dabyra-dabyl, anyqtalmaǵan aqparat, dáıeksiz derekter kóp jaǵdaıda jurtty shatastyrady, oqyrmandy adastyrady. Sondyqtan osyndaı aqparattyq shabýyldyń qazir biz Qazaqstanǵa da baǵyttalǵanyn kórip otyrmyz. Bul týraly Prezıdent te Semeıdegi sózinde atap ótti. Shyn máninde bul aqparattyq soǵys kezinde eldegi birlikti, berekeni, jalpy táýelsizdikti tuǵyrly etý úshin tek qana jazarman qaýymǵa ǵana emes, tutynýshyǵa da úlken jaýapkershilik júkteledi. Óıtkeni biz sol aqparatty taratý arqyly keıde zań buzýshylyq jasap otyrǵanymyzdy nemese tekserilmegen derekti taratyp otyrǵanymyzdy ańǵarmaı qalýymyz múmkin, - dedi ol.
Mınıstrdiń aıtýynsha, osyǵan baılanysty jalpy aqparattyq soǵys kezeńinde kez kelgen azamatqa úlken jaýapkershilik júkteledi.
“Ótkende DoS-shabýyl dep tehnıkalyq jaǵy da aıtyldy. Sodan keıin kıbershabýyldardyń da údegenin kórip otyrmyz. Mysaly, keshe Pavlodarda arnaıy bir feık-aqparat tarady. Ony da sheteldik azamat taratqanyn bildik. Sońǵy bir aıdy alyp qarasaq, otyz kúnniń ishinde Dinder sezi ótti, Rım papasy keldi. Qazaqstan Prezıdentiniń Nıý-Iorkke, Londonǵa syrtqy saparlary óte úlken rezonansqa ıe boldy. Sondyqtan Qazaqstandy bireýler turaqsyzdyqtyń aralyna aınaldyrǵysy keletin sııaqty. Munyń saılaýaldy kezeńmen tuspa-tus kelýi de oılandyrmaı qoımaıdy. Sol úshin muny arnaıy júıeler jasap jatqanyn baıqaý qıyn emes”, - deıdi Darhan Qydyráli.
“Adyrna” ulttyq portaly
