Oqý-aǵartý mınıstrligi Bilim salasynda sapany qamtamasyz etý komıteti "Pedagogti qorǵaý" Telegram chatyn iske qosty. Bul týraly vedomstvonyń baspasóz qyzmeti málimdedi, dep habarlaıdy “Adyrna” ulttyq portaly.
Málimetin boıynsha, bul chatta muǵalimder óz quqyǵynyń buzylǵany týraly habarlaı alady. Mysaly, mindetten tys fýnkııalarǵa tartý, shamadan tys esep berý jáne t.b. týraly.
"Telegramdaǵy chatqa kelgen barlyq aqparat tekserilip, Bilim salasynda sapany qamtamasyz etý komıtetiniń jáne aýmaqtyq departamentterdiń mamandary ótinishterge jedel túrde jaýap berip, muǵalimdermen baılanysady", - delingen habarlamada.
Mınıstrliktiń málimetinshe, "Pedagog mártebesi týraly" zańǵa sáıkes muǵalimder shamadan tys esep berýden bosatyldy. Qazirgi kúni pedagogter kúnine tek eki qujat qana, ıaǵnı synyp jýrnalyn men qysqa merzimdi (sabaq) josparyn toltyrýy kerek.
"Qujattardyń naqty tizimi bar jáne ony barlyǵy saqtaýy qajet. Mektep ákimshiligi muǵalimderden basqa qujattardy toltyrýdy talap etýge quqyǵy joq. Eger muǵalimderdiń quqyǵy buzylǵany anyqtalsa, onda komıtet tıisti sharalardy qabyldaıdy", - dedi Bilim salasynda sapany qamtamasyz etý komıtetiniń tóraǵasy Ernur Dáýenov.
Sonymen qatar, ol óńirlerde aýmaqtyq departamentter janynan pedagogıkalyq ádep jáne muǵalimderdiń quqyqtaryn qorǵaý jónindegi keńester jumys isteıtinin eske saldy.
