Almaty turǵyndarynyń sany jyl saıyn ósip jatyr. Sonyń 60 paıyzy kóshi-qon arqyly júzege asady. Bul týraly Prezıdent Qasym-Jomart Toqaev megapolıs turǵyndarymen kezdesý barysynda aıtty, dep jazdy «Adyrna» tilshisi.
Qala halqynyń sanynyń ósýi óz kezeginde qalanyń áleýmettik ınfraqurylymyna eleýli áser etedi. Qazir qaladaǵy balabaqshalarda 19 myńnan astam oryn jetpeıdi. Bul tapshylyqty azaıtý úshin memlekettik jáne jeke menshik balabaqshalardy shuǵyl túrde salý qajet-aq.
«Balalardy memlekettik bilim tapsyrysy arqyly mektepke deıingi jeke bilim berý mekemelerine ornalastyrý qajet. Ákimdikke úshten alty jasqa deıingi balalardyń 97 paıyzyn mektepke deıingi bilimmen qamtýdy tapsyramyn. Bul mindetti 2025 jylǵa deıin oryndaý kerek»,-dedi Toqaev.
Almatyda oqýshylardyń sany jyl saıyn orta eseppen 12-15 myńǵa artyp keledi. Sol sebepti, mektepterde oryn tapshylyǵy joǵary. Qazir 29 myńnan astam oqýshyǵa oryn jetpeıdi. Bul ahýal oqýshylardyń sapaly bilim alýyna keri áser etedi.
«Almatyda aldaǵy eki jyl ishinde «Jaıly mektep» jobasymen 37 myń oryndyq 22 mektep salý kerek. Basty mindet – 2030 jylǵa qaraı bir aýysymmen oqytýǵa tolyq kóshý. Ishki mıgraııa qarqyndy damyp jatqandyqtan, osyndaı máseleler týyndap otyr. Alaıda, jas urpaqty sapaly balabaqsha, mekteppen qamtamasyz etý – bizdiń mindetimiz. Sondyqtan, bul tapsyrmalar mindetti túrde tolyq oryndalýy kerek»,-deıdi Prezıdent.
