"TechnoGrad" kompanııasynyń basshysy Zııa Talǵatov osyndaı qıyn-qystaý ýaqytta kompanııa men onyń árbir qyzmetkeri azamattyq kórsetýge daıyn ekendigin atap ótti. Olar ekibastuzdyqtardy qoldan kelgenshe demep, ıgi bastamalarǵa at salysýǵa ázir.
- Qazir 500 radıator (jylytqysh qurylǵylar) tıelgen júk kóligi jolǵa shyqty. Bizdiń kompanııa qaıyrymdylyq jumystarymen belsendi aınalysady. Jyl saıyn bıýdjetten halyqty áleýmettik qoldaýǵa dep, atap aıtqanda, mektepter, úıler, meshitter salýǵa jáne shalǵaı eldimekendegi balalarǵa syılyqtar berý úshin shamamen 30 mıllıon teńge bólinedi. Jalpy, eger jaqyńyzǵa kómektesýge múmkindigińiz bolsa, ony jasaımyn dep jatsańyz, eshkim sizge qolbaılaý bolmaıtynyn atap ótkim keledi. Eń qıyn saǵatta adamdardyń bir- birin qoldaýy birligin arttyryp, elimizdi kúshtirek ete túsedi, - deıdi "TechnoGrad" kompanııasynyń basshysy Zııa Talǵatov.
Jylytqysh qurylǵylar búginde Ekibastuz qalasyna sátti jetkizildi. Olar turǵyndardyń ótinishi boıynsha birden taratylǵan. Ekibastuz qalasy ákiminiń orynbasary Marııam Malıkova atap ótkendeı, qurylǵylar Baýyrjan Momyshuly men Máshhúr Júsip kóshesindegi kóppáterli úılerdiń turǵyndaryna tabystaldy.
"Adyrna" ulttyq portaly
