(ömırdıŋ özı satira)
I
Ötken jylǧy küzde Pavlodardaǧy HQO-nyŋ (SON) qyzmetkerı äiel adam keluşılerdıŋ bırınen bır qorap «Rafaello» degen kämpit alu üstınde ūstaldy. Bır qorap kämpit! Ne degen sūmdyq! Bastalmaǧan tūtas bır qorap kämpit alǧan!
Bıraq «qylmyskerdıŋ» būl äreketı ıske aspady. Sybailas jemqorlyqqa qarsy ıs-qimyl qyzmetınıŋ qyraǧy közı būny qalt jıbermei, «paraqor» äieldı dereu qūryqtap, bır qorap kämpit memlekettık qorǧa tapsyryldy. Söitıp, memlekettık dünie-mülık qory bır qorap kämpitke tolyqty. Qalai quanbassyz! Būl oqiǧany sol kezde äleumettık jelıler de, oblystyq jaŋalyqtar qyzmetı de jarysa jazyp, jariia qyldy. Söitıp, Pavlodar oblysyndaǧy sybailas jemqorlyqqa bırjola tosqauyl qoiyldy!
Jasasyn qūqyq qorǧau jüiesı! Jasasyn korrupsiiaǧa qarsy qyzmet toby! Eger būl qylmys sol arada aşylyp, halyqqa jariia bolmasa, memleketımız būndai orasan ekonomikalyq soqqyny kötere almas edı... Qūryp ketu mümkın edı.
Esıme HIH ǧasyrdyŋ ekınşı jartysynda jasap ötken orystyŋ ataqty advokaty F.Plevako tüstı. Osy Plevakonyŋ zamanynda bır qaiyrşy kempır qūny 5 tiyn tūratyn mys şäinek ūrlap, sotty bolady. Aqşasy joq jetım kempırdı eşkım tegın qorǧaǧysy kelmeidı. Sonda kempırdıŋ tegın qorǧauşysy bolǧan Plevako sot prosesı üstınde bylai degen eken:
–Būl sorly Resei nenı bastan keşpedı?! Ol aşarşylyqty da, qyrǧyn soǧysty da, küizelıstı de bastan ötkerdı. Bıraq Resei osynyŋ barlyǧyna tözıp keldı, qūryp ketpedı. Endı kelıp, myna bır kempır 5 tiynnyŋ mys şäinegın ūrlapty. Bıttı! Resei būndai soqqyǧa töze almaidy, Resei qūridy endı!
Ärine, Plevakonyŋ būndai sözınen soŋ, kempırdı aqtap jıberedı.
Baǧasy 500 teŋge tūratyn bır qorap kämpit alyp ūstalǧan SON qyzmetkerı jaily oqyǧanda, osy äŋgıme esıme tüstı.
II
2016 jyldyŋ 5 qyrküiegı künı korrupsiiaǧa qarsy ūlttyq biuro «Horgos» halyqaralyq şekaralyq yntymaqtastyq ortalyǧynyŋ (keden) prezidentı Vasilii Nidıŋ million dollar kölemınde para alyp jatqanda ūstalǧany jaily habarlady. Bıraq keiın Almaty qalalyq soty Nidıŋ būl äreketınde qylmystyŋ bolmauyna bailanysty, ony bırjola aqtap jıberdı...
Şynyn aitsaq, osyǧan keremet riza boldyq. Kım almai jatyr qazır parany? Million dollar degen ne täiırı? Mümkın būl şamaly soma Nidıŋ bır ūsaq-tüiek şaruasyna qajet bolǧan şyǧar. Bıraq sony tüsıne bılgen bızdıŋ sot jüiesın aitsaŋşy! Netken ädıl, netken keŋqoltyq adamsüigış jüie! Ni myrzany basynan bır sipady da, qoia berdı.
Şynyn aitu kerek, ärkımnıŋ jaǧdaiyn tüsıne bıletın osyndai zaiyrly memlekette ömır sürıp jatqanyŋ üşın keide taǧdyryŋa şeksız riza bolasyŋ!
Bıraq ana bır paraǧa kämpit alatyn äiel sekıldı adamdardan saq boluymyz kerek, aǧaiyn! Olar qoǧamǧa qauıptı!
Sailau Baibosyn
