Qasym-Jomart Toqaev Almaty qalasyna jūmys saparymen baryp, qaŋtar oqiǧasynyŋ qūrbandaryna arnalǧan «Taǧzym» memorialynyŋ aşylu räsımıne qatysty, dep habarlaidy «Adyrna» tılşısı Aqordaǧa sılteme jasap.
Memleket basşysy jinalǧandar aldynda söilegen sözınde bügıngı şaranyŋ elımız üşın airyqşa mänı bar ekenın atap ötıp, qasırettı qaŋtardan berı bır jylǧa juyq uaqyt ötkenın, būl täuelsızdık kezeŋındegı eŋ kürdelı oqiǧanyŋ bırı bolǧanyn aitty.
– Sol künderı halqymyzǧa zor qauıp töndı. Memlekettıgımızdıŋ tūǧyry şaiqala jazdady. Tıptı, «el bolyp qalamyz ba, joq pa» degen sūraq tudy. Bıraq bız myzǧymas bırlıgımızdıŋ arqasynda qaterdıŋ betın qaitardyq. Eldıgımızdı tanyttyq, myqty memleket ekenımızdı körsettık. El ışıne ırıtkı salǧysy kelgen toptarǧa tosqauyl qoiyp, jymysqy ärekettıŋ jolyn kestık. Bırqatar qalada ötken beibıt şeruler jappai tärtıpsızdıkke ūlasty. Äsırese, täuelsızdıgımızdıŋ altyn besıgı – Almaty qalasy qatty zardap şektı. Qaraqşylar qalany qiratty. Küştık qūrylymdarǧa şabuyl jasap, qaru-jaraq qoimalaryn tonady. Sonyŋ kesırınen jazyqsyz adamdar opat boldy. Qiraǧan dünienı qalpyna keltıruge bolady. Bıraq üzılgen ömır qaita jalǧanbaidy. Mūndai oqiǧa eşqaşan qaitalanbauy üşın bız qoldan kelgennıŋ bärın jasap otyrmyz,—dedı basşy.Qasym-Jomart Toqaev qaŋtar qasıretı el tarihyndaǧy ülken synaq retınde halqymyzdyŋ jadynda saqtalatynyn atap ötıp, Almatyda «Taǧzym» memorialyn ornatudy jön körgenın jetkızdı.
– Şyn mänınde, būl eskertkıştıŋ maǧynasy tereŋ, maŋyzy öte zor. Mūnda Qazaq elınıŋ memlekettıgın nyǧaitu jolyndaǧy qily kezeŋder körınıs tapqan. Tas tūǧyrlarǧa äigılı tūlǧalarymyzdyŋ öleŋderı jäne ösietterı jazylǧan. Ūltty ūiystyratyn osy sözder ärqaisymyzǧa oi salady. Būl memorialdy qaŋtarda qaza bolǧan azamattardyŋ ruhyna taǧzym retınde tūrǧyzdyq. Sondai-aq ony keiıngı ūrpaqqa taǧylym bolsyn dep ornattyq. Men osy memorialdyŋ boi köteruıne atsalysqan säuletşılerge jäne barlyq azamattarǧa rizaşylyǧymdy bıldıremın, – dedı Prezident.
