Oqulyq avtorlarynyŋ qatelıgın 2-synyp oquşysy äşkere ettı. Būl turaly jurnalist Dina İmambai feisbuk paraqşasyna jariialady, dep habarlaidy “Adyrna” ūlttyq portaly.
Aituynşa, belgılı aqyn Quat Adistıŋ qyzy oqulyqta äkesınıŋ öleŋın özge aqynnyŋ öleŋı dep qoiǧanyn baiqaǧan.
“Ötırıktıŋ qūiryǧy bır-aq tūtam” degen osy. Jalpy bılım beretın mekteptıŋ 2-synybyna arnalǧan “Ädebiettık oqu kıtabynyŋ” avtorlary B.Qabatai, V. Qalieva jäne Ü. Zeinetollina oqulyqqa aqyn Quat Adistıŋ öleŋın belgılı balalar aqyny Qastek Baianbaevtyŋ atynan bergen. Quattyŋ 2-synypta oqityn qyzy äkesınıŋ öleŋın tanyp, avtory qate jazylǧanyn baiqaǧan.
Oqulyq avtorlary, basqadan ūialmasaŋyzdar da kışkentai oquşylardan ūialsaŋyzdarşy!
Oqulyqqa engızıletın mätınderdı internettegı kümändı derekközderden alyp qūrastyru reputasiialaryŋyzǧa syn!
Quat Adis - balalarǧa arnalǧan bırneşe kıtaptyŋ avtory, tanymal aqyn”,- dep jazdy ol.
Sondai-aq, Dina İmambai oqulyq avtorlaryna qazaq ädebietınıŋ qazırgı klassigı Baibota Qoşym-Noǧaidy keŋesşılıkke şaqyruyna keŋes berdı.
“Balalar aqyndary men jazuşylaryn tanymasaŋyzdar, qazaq ädebietınıŋ qazırgı klassigı Baibota Qoşym-Noǧaidy keŋesşılıkke şaqyryŋyzdar.
Baibota aǧa - on tomdyq “Qazaq balalar ädebietı antologiiasynyŋ” qūrastyruşysy.
- Oqu-aǧartu ministrlıgın ūiatqa qaldyrǧan oqulyq avtorlary marqūm Qastek Baianbaevtyŋ otbasynan jäne Quat Adisten keşırım sūrauy tiıs.
- Myna oqulyq tügeldei qaita tekserılsın, jūmysyna jauapsyz avtorlarǧa aiyppūl salynsyn. Äitpese oqulyq salasyndaǧy bylyq toqtamaidy.
- Sapasyz oqulyq balalardy qazaq mektebınen bezdıruge äkep soǧady. Būl ūlt mektebıne jasalyp otyrǧan qastandyqpen teŋ”,- dep jazdy jurnalist.
Aqyn Quat Adis te renışın jasyrmady.
“Keşe 2 synyp oqityn qyzym "Sızdıŋ şyn atyŋyz Qastek Baianbai ma?", — dep sūraidy. Tük tüsınbei "Joq, balam, Qastek Baianbai qazaqtyŋ ülken aqyny ǧoi", — deimın men. Qolyndaǧy kıtabyn körsetıp, "Mynau sızdıŋ öleŋıŋız ǧoi. Men bärın jattap alǧanmyn. Bıraq, myna jerde sol adamnyŋ aty jazylǧan, suretı de basqa", — deidı qyzym taŋyrqap. Qaradym. Rasymen, 2 synyptyŋ "Ädebiettık oqu" oqulyǧynda menıŋ "Därumender dauasy" dep atalatyn öleŋımnıŋ ekı şumaǧyn Qastek Baianbaiǧa telıp jıberıptı. Äuelde basqa aqynnyŋ öleŋın köşırıp jazǧandai bolyp qyzymnan yŋǧaisyzdanyp qaldym. Mümkın, säikestık şyǧar deiın desem, öleŋımnıŋ ütır, nüktesıne deiın tanyp tūrmyn. 2021 jyly jaryq körgen kıtabyma engen. Tıptı ol kıtapty "Därumender dauasy" dep te ataǧam.
Bırden baibalam salmaiyn dep baiyppen qarap şyqtym. Atalǧan oqulyq biyl, iaǧni 2022 jyly "Atamūra" baspasynan şyǧypty. Alǧaşqy betıne "Oqulyq bastauyş bılım beru deŋgeiınıŋ 2-4 synyptaryna arnalǧan "Ädebiettık oqu" pänınıŋ ülgılık oqu baǧdarlamasyna säikes daiyndaldy" dep jazylypty”,- dedı Quat Adis.
Sondai-aq, ol oqulyq avtorlarynyŋ tekserılmegen saittan alyp, kıtapqa jariialai salatynyna qapaly.
“Mümkın, osyǧan ūqsas öleŋderı bar şyǧar degen oimen üidegı kıtaphanamda bar Qastek Baianbaidyŋ kıtaptaryn bırneşe märte qarap şyqtym. Taba almadym. Bolmaǧan soŋ Guglǧa kırdım. Mıne, qyzyq! bilim all, zharar saittary "Därumender dauasyn" tolyqtai jariialap, avtoryn Qastek Baianbai dep körsetıptı. Baqsam, baqa eken demekşı, kıltipan osy jerde siiaqty. Kıtapty qūrastyruşylar öleŋdı älgı saittardan alyp, oqulyqqa qotara salǧan. Avtoryn naqtylauǧa qūlqy bolmaǧan nemese erıngen. Jauapkerşılık bar jūmysta da boluy kerek qoi. Bıraq, ūrpaq tärbiesı üşın qolǧa alǧan igılıktı jūmysta jauapsyzdyq tanytqandarǧa ne deuge bolady?
Būǧan deiın de mektep oqulyqtaryndaǧy öreskel qatelıkter aitylyp, jazylyp keledı. Äitse de, tynys belgılerı nemese ärıptık qateler emes, tūtas tuyndynyŋ avtorlaryn şatastyrǧandaryn tüsıne alar emespın.
Qastek Baianbai menıŋ ǧana emes, bızdıŋ buynnyŋ eŋ süiıktı aqyny, tättı öleŋderımen tärbielendık. Balalar ädebietınıŋ klassigıne ekı şumaq öleŋımdı qimai otyrǧanym joq, tek sondai tūlǧany bızdei paqyrdyŋ deŋgeiıne tüsırgenderge aitar sözım bolmai otyr...”,- dedı aqyn.
