Oqýlyq avtorlarynyń qateligin 2-synyp oqýshysy áshkere etti. Bul týraly jýrnalıst Dına Imambaı feısbýk paraqshasyna jarııalady, dep habarlaıdy “Adyrna” ulttyq portaly.
Aıtýynsha, belgili aqyn Qýat Adıstiń qyzy oqýlyqta ákesiniń óleńin ózge aqynnyń óleńi dep qoıǵanyn baıqaǵan.
“Ótiriktiń quıryǵy bir-aq tutam” degen osy. Jalpy bilim beretin mekteptiń 2-synybyna arnalǵan “Ádebıettik oqý kitabynyń” avtorlary B.Qabataı, V. Qalıeva jáne Ú. Zeınetollına oqýlyqqa aqyn Qýat Adıstiń óleńin belgili balalar aqyny Qastek Baıanbaevtyń atynan bergen. Qýattyń 2-synypta oqıtyn qyzy ákesiniń óleńin tanyp, avtory qate jazylǵanyn baıqaǵan.
Oqýlyq avtorlary, basqadan uıalmasańyzdar da kishkentaı oqýshylardan uıalsańyzdarshy!
Oqýlyqqa engiziletin mátinderdi ınternettegi kúmándi derekkózderden alyp qurastyrý repýtaııalaryńyzǵa syn!
Qýat Adıs - balalarǵa arnalǵan birneshe kitaptyń avtory, tanymal aqyn”,- dep jazdy ol.
Sondaı-aq, Dına Imambaı oqýlyq avtorlaryna qazaq ádebıetiniń qazirgi klassıgi Baıbota Qoshym-Noǵaıdy keńesshilikke shaqyrýyna keńes berdi.
“Balalar aqyndary men jazýshylaryn tanymasańyzdar, qazaq ádebıetiniń qazirgi klassıgi Baıbota Qoshym-Noǵaıdy keńesshilikke shaqyryńyzdar.
Baıbota aǵa - on tomdyq “Qazaq balalar ádebıeti antologııasynyń” qurastyrýshysy.
- Oqý-aǵartý mınıstrligin uıatqa qaldyrǵan oqýlyq avtorlary marqum Qastek Baıanbaevtyń otbasynan jáne Qýat Adısten keshirim suraýy tıis.
- Myna oqýlyq túgeldeı qaıta tekserilsin, jumysyna jaýapsyz avtorlarǵa aıyppul salynsyn. Áıtpese oqýlyq salasyndaǵy bylyq toqtamaıdy.
- Sapasyz oqýlyq balalardy qazaq mektebinen bezdirýge ákep soǵady. Bul ult mektebine jasalyp otyrǵan qastandyqpen teń”,- dep jazdy jýrnalıst.
Aqyn Qýat Adıs te renishin jasyrmady.
“Keshe 2 synyp oqıtyn qyzym "Sizdiń shyn atyńyz Qastek Baıanbaı ma?", — dep suraıdy. Túk túsinbeı "Joq, balam, Qastek Baıanbaı qazaqtyń úlken aqyny ǵoı", — deımin men. Qolyndaǵy kitabyn kórsetip, "Mynaý sizdiń óleńińiz ǵoı. Men bárin jattap alǵanmyn. Biraq, myna jerde sol adamnyń aty jazylǵan, sýreti de basqa", — deıdi qyzym tańyrqap. Qaradym. Rasymen, 2 synyptyń "Ádebıettik oqý" oqýlyǵynda meniń "Dárýmender daýasy" dep atalatyn óleńimniń eki shýmaǵyn Qastek Baıanbaıǵa telip jiberipti. Áýelde basqa aqynnyń óleńin kóshirip jazǵandaı bolyp qyzymnan yńǵaısyzdanyp qaldym. Múmkin, sáıkestik shyǵar deıin desem, óleńimniń útir, núktesine deıin tanyp turmyn. 2021 jyly jaryq kórgen kitabyma engen. Tipti ol kitapty "Dárýmender daýasy" dep te ataǵam.
Birden baıbalam salmaıyn dep baıyppen qarap shyqtym. Atalǵan oqýlyq bıyl, ıaǵnı 2022 jyly "Atamura" baspasynan shyǵypty. Alǵashqy betine "Oqýlyq bastaýysh bilim berý deńgeıiniń 2-4 synyptaryna arnalǵan "Ádebıettik oqý" pániniń úlgilik oqý baǵdarlamasyna sáıkes daıyndaldy" dep jazylypty”,- dedi Qýat Adıs.
Sondaı-aq, ol oqýlyq avtorlarynyń tekserilmegen saıttan alyp, kitapqa jarııalaı salatynyna qapaly.
“Múmkin, osyǵan uqsas óleńderi bar shyǵar degen oımen úıdegi kitaphanamda bar Qastek Baıanbaıdyń kitaptaryn birneshe márte qarap shyqtym. Taba almadym. Bolmaǵan soń Gýglǵa kirdim. Mine, qyzyq! bilim all, zharar saıttary "Dárýmender daýasyn" tolyqtaı jarııalap, avtoryn Qastek Baıanbaı dep kórsetipti. Baqsam, baqa eken demekshi, kiltıpan osy jerde sııaqty. Kitapty qurastyrýshylar óleńdi álgi saıttardan alyp, oqýlyqqa qotara salǵan. Avtoryn naqtylaýǵa qulqy bolmaǵan nemese eringen. Jaýapkershilik bar jumysta da bolýy kerek qoı. Biraq, urpaq tárbıesi úshin qolǵa alǵan ıgilikti jumysta jaýapsyzdyq tanytqandarǵa ne deýge bolady?
Buǵan deıin de mektep oqýlyqtaryndaǵy óreskel qatelikter aıtylyp, jazylyp keledi. Áıtse de, tynys belgileri nemese áriptik qateler emes, tutas týyndynyń avtorlaryn shatastyrǵandaryn túsine alar emespin.
Qastek Baıanbaı meniń ǵana emes, bizdiń býynnyń eń súıikti aqyny, tátti óleńderimen tárbıelendik. Balalar ádebıetiniń klassıgine eki shýmaq óleńimdi qımaı otyrǵanym joq, tek sondaı tulǵany bizdeı paqyrdyń deńgeıine túsirgenderge aıtar sózim bolmaı otyr...”,- dedi aqyn.
