Parlament mäjılısınıŋ deputaty Azat Peruaşev Qazaqstan atauymen qatar "Qazaq Respublikasy" atauyn da qoldanudy ūsyndy. Peruaşev būl turaly 23 qaŋtarda mäjılıste premer-ministr Baqytjan Saǧyntaevtyŋ atyna "Aq jol" partiiasy fraksiiasynyŋ atynan deputattyq saual joldady.
Peruaşev saualynda 2020 jyly SSSR qūramynda Qazaq Respublikasynyŋ qūrylǧanyna 100 jyl tolatynyn aityp, būl datany "laiyqty atap ötuge" şaqyrdy. Qazaqstan atauymen qatar resmi türde qoldanu üşın "Qazaq Respublikasy" degen ataudy qaita qoldanysqa engızu mäselesın qarastyrudy ūsyndy.
Onyŋ sözınşe, būl bastamany bes jyl būryn prezident Nūrsūltan Nazarbaev kötergen jäne ony ıske asyratyn uaqyt jettı.
"Qarany - qara, aqty - aq, qazaqty - qazaq dep, är närsenı öz atymen atau kerek. Respublikaǧa tıptı totalitarlyq bilık moiyndaǧan "Qazaq" atauyn qaitarsaq tarihi ädılettılık qaita ornap qana qoimaidy, ol eldegı barlyq ūlttyŋ dostyǧy men bırlıgıne dem beredı" dedı Azat Peruaşev.
"Adyrna" ūlttyq portaly
