Lira Qonys. Aigül

             AIGÜL I Tün ışınde telefon bezektedı,  jany qalmai oibailady.  Jetı qaraŋǧyda kımge kerek boldym dedım. Öitkenı, osy uaqytqa deiın būl jelı arqyly eşkım menı tamaqtandyŋ ba, moiynoraǧyşyŋ qalyŋ ba, etıgıŋnıŋ tabanynan suyq ötıp jürgen joq pa degen syqyldy janaşyr saualdarmen mazalaǧan emes. Tättı ūiqymdy būzyp telefonmen oinaǧan adamdy jaratpaimyn.  Söilespeimın.  Ūiqysyrap jürıp kelem. Tükpırde ūiyqtaimyn. Törgı bölmenı basyp öttım. Telefon baqyryp jatyr. Habarlasqysy kelgen beitanysqa degen aşuym üdei tüstı. Symtetık syrtqy esıktıŋ jaqtauyna ornatylǧan. -  İä. - Sälemetsız be, üide Laura bar ma? Qyz balanyŋ dauysy. Izdegenı özım ekenın aitpaqqa oqtaldym da, ainyp qaldym. - Saǧat qanşa boldy? - dep sūradym. - Keşırıŋız, men... - Men senen saǧat qanşa boldy dep tūrmyn?  Uaqytpen sanaspaityn adamdy qalamaimyn! Şoşyp ketken sırä, arǧy bettegı tūtqany ünsız jaiǧastyrdy. Körpemdı qaita bürkendım. Közımnıŋ qaita ılıngenı sol telefon taǧy da şyŋǧyra bastady. Törgı bölmenı dürsıldetıp, jügırıp öttım. - Ūiqy beresıŋder me, joq pa?! - Apai, keşırıŋız, Laurany telefonǧa şaqyryp jıberıŋızşı... Äldekım jalbarynyp tūr.  Apai deitındei sonşalyqty kärımın be? Qūdai apaidyŋ jasyna jetkızsın dep özımdı jūbattym. - Tyŋdap tūrmyn. Ne kerek? - Būl men, Aigülmın. - Ainalaiyn, erteŋ qūdaidyŋ taŋy atady, tauyq şaqyrady. Sol kezde habarlas! Tūtqany şöktırdım. Aigüldı tanymaidy ekenmın. Tösegıme bettedım. Qanşa ūiyqtaǧanym esımde joq. Telefonnyŋ üzdıkken ünınen oiandym. Taŋ şetı sögılıptı. - İä. - Sızder gazetke üi kütuşı kerek dep habarlandyru bergen ekensızder... Jyly su men jaryqtyŋ aqşasyn tölei almai jürgen maǧan qaidaǧy üi kütuşı. Şatasyp basqa päterge tüsıp ketkenın aituǧa tözımım jetpedı. - Men üi kütuşı emes, ǧaryşker kerek dep habarlandyru bergenmın! Tūtqany jalp etkızdım. Miym şyŋyldady, ūiqym qanbasa ünemı osylai. Boztorǧaidyŋ şyryly estılgende zaryldauyq taǧy ün qatty. Bügın men ne jyndanamyn, ne myna telefondy syndyryp bır-aq tynyştalamyn. - Būl kım? - Laura, saǧan ne boldy?  Keşegı dauys. - Būl kım? - Men, Aigülmın.  Sabyrsyzdyǧym dörekılıkke soqtyrdy. - Ne kerek? - Klastasyŋ Aigülmın. Mektep bıtırgelı alty jyl. Ülgerımı tömendermen dos bolmaitynmyn. Ädemı qyz edı. Zatynda, ädemı qyzdar sabaqty naşar oqidy. Būl da sol qatardan. Soŋǧy qoŋyraudan keiın kezıkpegem. - Esıŋe tüstım be? Qalyŋ qalai? - Jaqsy.  Ol oilaǧandai quana qoimadym. Sözdıŋ turasyna köştı. - Bügın toiym. - Qūttyqtaimyn. - Sen qalyŋdyq qūrby boluǧa qalaisyŋ... Uädelesken qyz anasy nauqastanyp kele almady. - Basqalarǧa habarlasyp körseŋşı, - dedım. Auzyma tüskenı sol ǧana. - Bızdıŋ qyzdardyŋ barlyǧy tūrmys qūryp ketıptı. Mūny estıp özımdı baqytsyz sanadym ba, äiteuır janymnan jaǧymsyz sezımdı aŋǧardym. - Toiyn jalǧyz ötkızsın demeseŋ kömektes.  Kelıspeske amalym qalmady. II Alty jyldan soŋǧy kezdesu asa naşar bolmady. Baǧyt – Neke saraiy. Aigül beitanys ortada qysylmasyn dep nazar audaryp älek. Tūmsyǧyna aq gül qystyrǧan limuzinde bes kısı: Jas otau ielerı, men jäne taǧy bır jıgıt. Aq qolǧapty jürgızuşı äŋgımege aralaspaidy. Jaqpaǧany küieu jıgıt. Tapal. Adam körkı şüberek degen söz jalǧan. Milandyq tıgınşınıŋ qolynan jaŋa şyqqan  kästöm onysyn jasyra almapty. - Aigül, bız bılmeitın qūrbyŋ bar ekenın nege erte aitpaǧansyŋ? - Laura, Aigül erterek tanystyrǧanda men saǧan üilener edım!  Äzılı ospadar. Onysyna özı ǧana külıp otyr. - Ekınşı äiel aluǧa rūhsat etetın zaŋ qabyldandy ma? Jaǧy semer emes. Qalyŋdyq erının tıstelep tömen qaraidy. Janǧa jaily äuenge eltıp, joldasy muzyka tyŋdaǧan bola qalypty. - Laura, sen kıtap jazasyŋ ba? - ... - Jazasyŋ ba? Bügın mynanyŋ auzyna tynym bolmaityn şyǧar. - Jazamyn! - Men turaly jazşy. Üileneiın dep jatqan kezde şyn mahabbatyn kezıktırıp qalatyn jıgıt jaily. Özım demeuşı bolam. Özım satyp alamyn.  Kölıktı toqtatyp tüsıp qalsam qaitedı osy dep oiladym. - Eger jaza qalsaŋ atyn ne dep qoiasyŋ?  Älı söilep otyr. - Saǧan orystardyŋ qai şyǧarmasy ūnaitynyn bılmeimın. Bıraq, sen turaly kıtap jazǧan adam atyn mındettı türde «Naqūrys» dep qoiar edı.  Taǧy da jalǧan külkı. Aq tıleulı saraiǧa da kelıp jettık. III Qaumalaǧan jūrttan qaǧa berıs qalyp küieu jıgıt tıl qatty: - Senıŋ jıgıtıŋ bar ma? - Mende jıgıtten de basqa mäsele bar.  Qalyŋdyq estımegensıdı. Äŋgımenı basqa tarapqa būrdy: - Köilegım qalai? - küieu joldastan sūraǧan. - Bökseŋdı fudbol doby ma dep qaldym. Apama jezdem sai ortaǧa qaidan ǧana kezıktım eken? Kuälık alar kez jaqyndaǧan. Küieu jıgıt joldasyna qarap ötırık küldı: - Qaşyp ketsem be eken?  Aq köilegınıŋ etegın tüzep jatyp qalyŋdyqty aiadym. - Menıŋ ornyma sen üilene salşy. Enjar, bastysy sezımsız dauys. Äldekımnıŋ üilenu toiyn taspadan tamaşalap otyrǧandai. Dosy jerge qarady. Neke jüzıgı salynǧan qorapşanyŋ betın aştym. Jazyqsyz qos saqinaǧa aianyşpen qaradym. - Senıŋ qolyŋdaǧy şynymen neke jüzıgı me? - Joq, būl ölgen qarǧanyŋ qanaty. Jekıp berdım. Qalyŋdyqtyŋ reŋı sūrlandy. - Jürıŋder!  Aigül kelınşekter bölmesınde bögele berdı. Qoltyǧynan demedım. - Aigül, senı baqytyŋ kütıp tūr. Osylai ädebi söileudı äste jaqtyrmaimyn, äitse de sol oraimen söz saptadym.  Janarynan tamşy üzılıp tüsıp, kırpıgınıŋ boiauy ıle tömen syrǧydy. Endıgısın bırdeme aitu qajetsız dedım. Esıkten şyǧyp, baspaldaqpen tömen tüse berdı. Jūrt şulasyp-dabyrlasty. Soŋyn ala şyqtym. Aq köilektı qalyŋdyq Esentai özenın boilap jügıre berdı. Soŋynan entıgıp küieu jıgıt jöneldı. Saǧan jetkızbeidı, būl qyz mektepte oqyp jürgende jelaiaq bolatyn dedım aiqailap. Rasynda jetkızbedı, baǧana qalai baiqamaǧanmyn dep selk ettım, onyŋ jauyryny tūsynda tap bır perıştenıkındei äppaq qos qanaty bar eken. Ol soŋyna bır ret te būrylmady, dabyrlasqan elden äudem jer ūzaǧan soŋ äsem qanattaryn sılkıp-sılkıp qaldy da, zeŋgır köktı betke alyp samǧap kettı...