«AMANAT» partııasynyń Atqarýshy hatshysy Elnur Beısenbaev Májilis jáne máslıhat depýtattyǵyna partııa atynan usynylatyn úmitkerlerdi irikteý jumysy bastalǵanyn jarııalady. Ol bul týraly óziniń Facebook jelisindegi paraqshasynda arnaıy jazba jarııalady.
«Keshe Májilis jáne máslıhat depýtattyǵyna partııa atynan usynylatyn úmitkerlerdi irikteý jumysy bastaldy. Ózderińiz bilesizder, resmı tirkelgen 7 partııanyń ishinde tek «AMANAT» partııasynyń el aýmaǵyndaǵy árbir aýdanda óz fılıaly bar, qazirgi tańda olardyń sany – 249. Budan bólek, elimizdiń túkpir-túkpirindegi partııalastardyń basyn biriktiretin 4 myńǵa jýyq bastaýysh uıymdarymyzda 800 myńnan astam múshemiz bar. Májilistegi 98 depýtattyń 69-y – partııalyq tizim arqyly, 29-y – bir mandatty okrýgterden saılanady. El aýmaǵyndaǵy 223 máslıhatqa barlyǵy 3415 depýtat saılanýy tıis», - dedi E.Beısenbaev.
Onyń aıtýynsha, partııa Májilis jáne barlyq deńgeıdegi máslıhattarǵa shynaıy báseke jaǵdaıynda myqty úmitkerlerdi usynady. Sondaı-aq, Atqarýshy hatshy «AMANAT» partııasynyń jańa quramdaǵy depýtaty qandaı bolýy kerek ekenin aıtty.
«Halyqpen tikeleı jumys istep, ult múddesin bárinen joǵary qoıatyn bilikti azamat bolýy tıis. Sondyqtan partııanyń úmitkerleri – qolynan is keletin, elge qyzmet etem deıtin partııalastardyń arasynan ádil tańdalady», - dedi ol.
Qazirgi tańda jer-jerdegi bastaýysh partııa uıymdary aldaǵy kúnderi ótetin partııanyń aımaqtyq konferenııalaryna óz delegattaryn irikteýdi bastap ketken. Delegattar konferenııada partııa atynan máslıhat saılaýyna qatysatyn úmitkerler tizimin jasap, bekitedi. Dál osy tártippen oblystyq máslıhat depýtattyǵyna úmitkerler tizimi de bekitiledi.
Sonymen qatar, Elnur Beısenbaev bir mandatty úmitkerlerdiń jáne partııalyq tizimdi jasaýdyń ashyq ótýine basa nazar aýdardy. Ol kandıdattardy irikteýdegi «AMANAT» partııasynyń basty ustanymdaryna toqtaldy.
«Ókilettilik jáne ashyqtyq, ádildik jáne jańarý. Partııa úshin eń bastysy, úmitkerler qoǵam suranysyna saı, halyq talabyna jaýap beretin azamattar bolýy tıis. Partııalyq tizim arqyly bolsyn nemese bir mandatty okrýg arqyly bolsyn, saılaýǵa túskisi keletin úmitkerler eń áýeli óz isiniń mamany bolýy kerek. Qoǵamnyń úni bolyp, halyq múddesine jumys isteý úshin belgili bir bilim men tájirıbe kerek. Biz ádil irikteý jasaımyz: haıp izdegenderdi emes, halyq amanatyna adal jumys isteıtin azamattardy qoldaımyz. Biz kúshimizge senimdimiz, tartysty básekege tas-túıin daıynbyz»,- dedi Atqarýshy hatshy.
“Adyrna” ulttyq portaly
