Qoǵam belsendisi Arman Shoraev Orda Life YouTube-kanalyna bergen suhbatynda Májilis saılaýyna túsetinin málim etti, dep jazady "Adyrna" ulttyq portaly.
"30 paıyz mojarıtarlyq okrýgterden ótedi deıdi. Ol da jaqsy jańalyq qoı. Biraq qazirdiń ózinde anadan-mynadan qyzdar-jigitter habarlasyp: "Ákimshilik ózderiniń kandıdattaryn daıyndap jatyr. Úıtip jatyr, búıtip jatyr. Bizdi jibermeıdi ǵoı" deıdi. Bılik tarapynan úlken qatelik osy. Eger shynymen kez-kelgen azamat eshqandaı buǵattaýsyz sol saılaýǵa túse alsa, saılaýda jeńip shyqsa, ol bılik úshin de, basqalary úshin de abyroı bolar edi. Óıtkeni, bilesizder sońǵy 20 jyl bizdiń Parlamentte tek qana bıliktiń sózin sóıleıtin azamattar otyrdy. Onyń nátıjesin bárimiz kórip otyrmyz. Eger Parlamentke kerisinshe bılikke qarsy sóıleıtin, halyqtyń munyń aıǵaılatyp aıta alatyn azamattar kelse, onda bizde byltyrǵydaı qandy qańtar bolmaýshy edi. Gazdyń baǵasynan bastaldy. Ol qarapaıym halyq úshin úlken problema. Biraq ta, ókinishke qaraı depýtattar ún shyǵarǵan joq. Byltyr jazdan bastap qysqa deıin sol gazdyń baǵasy kúnnen-kúnge ósip bara jatqanda birde-bir depýtat "áý" degen joq. Sondyqtan halyq ózi eshkim ony qorǵamaǵasyn, eshkim onyń múddesin jetkizbegesin dalaǵa shyqty. Onyń sońy qantógiske aınaldy", - deıdi Shoraev.
Arman Shoraev Májilis saılaýyna óziniń týyp-ósken Aqmola oblysynan emes, elordadan qatysatynyn aıtty.
"Saılaýǵa týǵan elimnen túspeımin. Óıtkeni týǵan elimde aýzym kúıgen. Men osydan 20 jyl buryn sońǵy mojarıtarlyq saılaýǵa qatysqanmyn. Sonda qyzyq oqıǵa bolǵan. 12 balama kandıdat boldyq. Birinshi týrda 70 paıyz aldym. Biraq ta ákimshilik 3 táýlik maǵan bergen bıýlletenderdi joqqa shyǵaryp, 2 týrǵa da jibergen joq. Mojarıtarlyq júıe boıynsha oblystardan shyǵý qıyn. Óıtkeni ár eldi-mekende saılaý ýchaskesi bar. Anaý aýylda, mynaý aýylda degen sııaqty... Aqmola oblysy - halqy az bolsa da, úlken oblystardyń biri. Ár ýchaskige az degende 2 baqylaýshy qoıý kerek. Sondyqtan bul bolmaıtyn nárse. Ózimniń naǵashy jurtym turatyn Zerendi aýdany áli esimde... Sol kezde búkil aýdannyń maǵan daýys bergenin bilemin. Biraq ta, aýdan ákimi túńilip, saılaý komıssııasynan shyqpaı, úıtip-búıtip múldem maǵan bir daýys bergizbedi. Bergen daýystyń barlyǵyn joqqa shyǵardy. 20 jylda eshteńe ózgergen joq. Sondyqtan men Astana qalasynan baq synaımyn",- dep málimdedi qoǵam belsendisi.
Keshe Arman Shoraev QR Parlamenti Májilisiniń depýtattyǵyna úmitker retinde qujattaryn tapsyrdy.
"Arman myrza Astana qalasynyń 2-shi okrýgyna qujattaryn tapsyrdy!",- dep jazdy jýrnalıst Dına Elgezek.
"Adyrna" ulttyq portaly
