Qajylyq pen umraǧa aparatyn «Käusar trevel» turistık kompaniiasyna qatysty tergeu bastaldy. Osydan bır apta būryn Şymkentte, bügın Almatyda bır top azamat atalmyş turfirmaǧa aldandyq dep aryz jazǧan, dep habarlaidy «Adyrna» tılşısı «KTK» arnasyna sılteme jasap.
Qazırgı taŋda 300-den asa adam aldanǧan. Basym bölıgınıŋ Mekke men Mädinaǧa ūşu merzımı äldeqaşan ötıp ketken. Endı özgelerı turfirmanyŋ bylyǧy köp ekenın bılıp, qomaqty qarajatyn qaitaryp berudı talap etıp otyr.
Byltyr 73 jastaǧy Jasqairat Ämırǧaliev jūbaiymen jūbyn jazbaǧanyna 45 jyl tolypty. Sonyŋ qūrmetıne ūl-qyzdary 1,2 million teŋgege Umraǧa joldama satyp alyp bergen. Merzım boiynşa ekeuı qazır kielı jerde boluy kerek edı. Bıraq aqsaqaldyŋ turfirma keŋsesınıŋ aldynda ainalşyqtap jürgenıne bır aptaǧa jetken.
"Aqşa da, joldama da, qajylyq ta joq. Dalada qaldyq. Bastyǧy Medet Mekebai degen jıgıt eken, 27 jasta. Sol kısınıŋ özıne jolyqtym, aittym. "Erteŋ aqşaŋyz tüsedı, bolady". Sonymen älı jür. Miyma eş qondyra almaimyn. Sebep ne? Būlar endı Allanyŋ jolynda jürgen adamdar, sütten aq, sudan taza dep esepteitın edım. Qazır endı köŋılım qatty qalyp otyr", - deidı ol.Aldanǧan adamdardyŋ ärqaisy joldamany 500-600 myŋ teŋgenıŋ töŋıregınde satyp alypty. Bärıne bırdei osyndai tölendı degen bır japyraq qaǧaz ǧana ūstatqan.
"Bız üş bilet alǧanbyz. Joldas balam üşeu aldy. Jalpy, alty bilet. Men anama, jeŋgeme, qyzyma alǧanmyn. 23-ı ūşu kerek bolǧan. 23 künı keŋsesıne keldık. Ol kısı: "10 million bar, sony taratam" dep aitty. Aqşasyn qaitarsyn degender JSN bersın dedı. JSN berdık, aqşany qaitarmady", - deidı Almaty tūrǧyny Ermūrat Bimūrzaev.Jurnalister "Käusar treveldıŋ" äleumettık jelıde tūrǧan nömırıne qoŋyrau şalyp körgen, alaida ol öşırulı bolǧan. Söitse kompaniia eşbır jerde tırkelmegen, ne lisenziiasy joq.
"Umra men qajylyqqa aparatyn kompaniialar da "Turistık qamqor" qorynyŋ tızımınde tūrady. Osyǧan nazar audaru kerek. Al "Käusar trevel" kompaniiasy tızımde joq. Tırkelmegen. Tūrǧyndar qyzmet körsetudegı zaŋbūzuşylyqqa tap bolǧan siiaqty. Būl kompaniiaǧa jügıner aldynda turistık kodty talap etuıŋız kerek edı", - dep tüsındırdı "Turistık qamqor" qorynyŋ töraǧasy İnna Rei.Aldanǧanyn keş tüsıngen jūrt poliseilerge jappai aryz jazdy. Bügınnen bastap tärtıp saqşylary atalmyş kompaniiaǧa qatysty tergeudı bastady.
"Almaty PD, Medeu audany PB-na bır kün būryn ekı adam aryzdansa, bügın taǧy segız jäbırlenuşı aryz jazǧan. Män-jaiy jan-jaqty zerdelenıp, QR zaŋnamasyna säikes, odan ärı şara qoldanyla otyryp, qūqyqtyq baǧa berıletın bolady", - deidı Almaty qalasy Polisiia departamentınıŋ resmi ökılı Saltanat Äzırbek.
