Älgınde ǧana estıgen myna habardan janym türşıgıp, älı öz-özıme kele alar emespın. Bır oiym "būl mümkın emes, aqparattyq tehnologiia damyǧan däuırde Astananyŋ tübındegı oqiǧany jurnalister qalaişa qalt jıberdı?" dep menı sabyrǧa şaqyrsa, ekınşı oiym "Būl oqiǧany dereu halyqqa jetkız! Balalardy qorqau qatynnyŋ qūrsauynan qūtqarsyn!" - dep tynym taptyrmai, janymdy jegıdei jep barady.
Basynan bastasam, qorlyqta jürgen balalardyŋ auyr jaǧdaiyn jetkızgen adamdy jaqsy tanimyn. Ol - Ekıbastūz öŋırıne syily adam. İmany berık, namazǧa jyǧylady. Otbasynyŋ ūiytqysy. Adal jar, aiauly ana, bauyrlarynyŋ qamqorşysy. "Maǧan aitqan äŋgımeŋızdı taǧy kım estıdı?" - dep sūrap edım: "İmamnyŋ äielı. Bız oǧan Balalar üiı ornalasqan auyldyŋ imamyna şyǧyp, män-jaidy anyqtaŋyzdar, qajet bolsa, imam jetkınşekterge kömek qolyn sozsyn dep edık, "Būl olardyŋ ışkı mäselesı" dep aiaǧyn baspady. Küieuı qazır alys saparda", - dedı tanysym nalyp.
Tanysymnyŋ tuysy (ol kısını men de jaqsy tanimyn) Astana qalasynda tūrady. Bırer jyl Astanaǧa jaqyn auyldardyŋ bırındegı mektepte Balalar üiınıŋ tärbielenuşılerıne sabaq berıptı. Balalar üiınıŋ direktory - äiel, ūlty orys. Jeke şaruaşylyǧy bar. Tanysymnyŋ aituynşa, däulettı äiel älgı jetımekterdı basybaily qūlyna ainaldyrǧan. Tünnıŋ bıruaǧynda qaljyrap kelıp, tösekterıne qūlaityn balalardyŋ būl künde sabaq oquǧa qūlqy da, uaqyttary da joq eken. "Balalardy äbden ürei bilep alǧan. Ünemı şarşap-şaldyǧyp jüredı. Kei künderı denelerınen kögergen daqty közım şalyp qalady", deptı mūǧalım. Suyrtpaqtap sūrasa, zärezap bolǧan jetkınşekter jūmǧan auyzdaryn aşpaidy eken.
Ol ol ma, esırgen direktor bırde qazaq balalaryn şırkeudıŋ dıni qyzmetkerıne aparyp "mynalardy şoqyndyr" degen ǧoi. Pop bırden bas tartypty: "Bala qai dınge kıretının 15-16 jastan bastap özı taŋdauy tiıs. Älı oŋ-solyn tanymaǧan balalardy mäjbürlep hristian dınıne kırgıze almaimyn". Poptyŋ būl sözı doly qatynnyŋ şamyna tiıp, ol endı balalarǧa öz betınşe dıni därıs beruge köşıptı. "Menıŋ denemnıŋ sau tamtyǧy joq. Dıni sözder jattauǧa qiyn dep edım, ūryp-soqty",- dep balalardyŋ bırı mūǧalımıne mūŋyn şaǧypty.
"Osy uaqytqa deiın bırde-bır bala nemese qyzmetker direktordyŋ üstınen şaǧymdanbaǧan ba?" - degen saualymyzǧa, tanysym: "Nege şaǧymdanbasyn. Talai ret joǧary jaqqa aryz jazǧan ǧoi. Aryzǧa bailanysty bırneşe ret komissiia şyǧyp, tekseru jürgızgen. "Basy auyrmastyŋ qasynda jany aşymas" demekşı, tekseruşıler "bärı qalypty" dep, jabuly qazandy jabuly küiınde qaldyrǧan. Bıletınder direktordyŋ "kryşasy" joǧaryda otyrǧanyn aitady", - deidı tanysym tüŋılıp.
"Balalardyŋ adam tözgısız ömırın ary qarai köruge jüregım şydamady. 2018 jyldyŋ şılde aiynda öz erkımmen jūmystan şyǧyp kettım", deptı mūǧalım tanysyma.
Äŋgımenıŋ ūzyn-yrǧasy osy.
P.S. Bızdıŋ anyqtaǧanymyzdai būl jetım balalar üiı Malaia Timofeevka selosynda ornalasqan. Svetoch balalar üiı dep atalady eken. Balalardy şoqyndyrmaq bolǧanyn estıdık deidı auyl tūrǧyndary. Bızdegı bar aqparat osy.
Dariia Erǧazinanyŋ Feisbuktegı paraqşasynan
