1997 jyly Gýamnyń áýejaıyna jete bergende Korean Air-diń ushaǵy apat boldy. 223 adam jan tapsyrady.
1990 jyly Kolýmbııanyń Avianca áýekompanııasynyń otyny taýsylyp qalyp, Nıý Iorktiń janyna qulady. 73 adam kóz jumdy.
Bul áýe apattaryna kóptegen sebep bar. Biraq solardyń ishinde eń mańyzdysy - mádenı sebep bolyp shyqty.
Ǵalymdardyń aıtýynsha, keıbir elderde úlken adamnyń (máselen, qyzmeti, abyroıy joǵary) sheshimine kúmán keltirý - durys mádenı norma emes.
Ushaqtaǵy eki ushqyshtyń biri - kapıtan. Eki jaǵdaıda da ekinshi ushqysh kapıtannyń qateligin der kezinde eskertpegen, tipti eskertýge ımengen bolyp shyqty.
Keshe Reseıdiń Ýkraınaǵa soǵys ashqanyna bir jyl toldy.
Jýyrda saraptamalyq materıal jarııalandy. Pýtın Ýkraınany basyp alam dep sheshim shyǵararda tóńiregi oǵan shyndyqty aıtýǵa ımengen eken, onyń estigisi kelgenin ǵana aıtyp otyrǵan. Sebebi kapıtannyń paıymyn joqqa shyǵarýǵa qorqady. “Qazirgi Reseıdiń álsiz tusy osy”, - deıdi sarapshylar. Nege olaı? Óıtkeni Pýtın ózi ustanǵan saıasatqa kúmán keltirgenderdi alastatyp, tek qana qoldap-qýattaıtyndardy ǵana janyna jýystyryp otyrǵan eken.
Kapıtanǵa ushaq pen ushý barysy týraly aqıqat aıtylmaǵan soń, ushaqtar apatqa ushyraıdy eken. Memleketter de ushaqtar sekildi, kapıtanǵa shyndyqty aıtatyn adam qalmasa, ulttar da uzaq usha almaıdy.
Shyńǵys MUQAN
