8 aqpanda Aqtöbe, Almaty men Qyzylorda qalalarynda ondaǧan adam bilıkke balaǧa tölenetın järdemaqyny köbeitu, köp balaly otbasylardy baspanamen qamtamasyz etu jäne özge äleumettık problemalardy şeşudı talap etıp bardy.
Aqtöbede qala äkımdıgıne barǧan adamdardy äkımdıktıŋ jauapty qyzmetkerlerı qabyldady.
— Är balaǧa aiyna 20 myŋ teŋgeden järdemaqy tölensın, bastauyş synyp oquşylaryn tegın tamaqpen jäne qoǧamdyq kölıkte tegın jüruın qamtamasyz etsın, üş jäne odan köp balasy barlarǧa baspana berılsın, az qamtylǧan otbasylarynyŋ nesielerı keşırılsın, eŋbek jäne halyqty äleumettık qorǧau ministrı Mädina Äbılqasymova qyzmetınen ketsın degen talaptar qoidyq, — dedı äkımdıktegı kezdesuge qatysqan qala tūrǧyny Läzzat Jūmaǧalieva.
Köp balaly ana Janymkül Bijanovanyŋ sözınşe, olarmen kezdesken şeneunıkter aryz-ötınışterı boiynşa jūmys nätejesın on künnen keiın habarlaityndaryn aitqan.
Jūma künı Qyzylorda qalasyndaǧy jūmyspen qamtu ortalyǧyna kelgen ondaǧan köp balaly ana memleketten berıletın äleumettık järdemaqynyŋ dūrys bölınbei otyrǧanyn aityp, narazylyq bıldırdı. Olar järdemaqy töleitın organ özderınen tırkeuge tūrudy talap etetının, bıraq jeke baspanasy joq bolǧandyqtan tırkeuge tūru maşaqatqa ainalǧanyn aitady.
— Balaŋyzǧa [järdemaqy] alasyz, zeinetaqy alady ekensız, eneŋız zeinetaqy alady eken deidı. Halyq qai jaqqa baryp jūmys tabady? Qyzylordalyqtar qūldyqta jür. 37-40 myŋ teŋge alady, eŋ joǧarǧy ailyq — 50 myŋ teŋge. Bır janūiadan tört-bes baladan bar, — deidı köp balaly ana Zinagül Bazylbekova.
Narazy analarǧa jolyqqan Qyzylorda qalasy äkımnıŋ orynbasary men «Nūr Otan» partiiasynyŋ ökılı är adamnyŋ mäselesın jeke şeşuge uäde berdı.
Almaty şeneunıkter jergılıktı bilıkke talappen kelgen analarǧa aryz-ötınışın tyŋdau üşın qalalyq jūmyspen qamtu jäne äleumettık baǧdarlamalar basqarmasy ışıne kırudı ūsyndy. Kezdesuge Azattyq jurnalisterı kırgızılmeitının aitqan şeneunıktıŋ sözıne sol jerge jinalǧandardyŋ keibırı narazylyq bıldırdı.
Keiın mälım bolǧanyndai, narazy analarmen Almaty äkımınıŋ orynbasary Erlan Äukenov kezdesıp, bilık olardyŋ aryz-ötınışterıne ekı aptadan keiın jauap beretının aitqan.
4 aqpanǧa qaraǧan tünı Astananyŋ Köktal-1 şaǧyn audanynda jeke üidıŋ aulasyndaǧy uaqytşa baspana örtenıp, bır otbasyndaǧy 2006, 2008, 2013, 2015 jäne 2018 jyly tuǧan bes qyz bala opat bolǧan edı. Jergılıktı bilıktıŋ deregınşe, köp balaly otbasy tūryp jatqan baspanada ört şyqqanda balalardyŋ ata-anasy jūmysta bolǧan.
Būl habar äleumettık jelıde qyzu talqylandy. Bilıktı synaǧan pıkırlerdıŋ arasynda eŋbek jäne äleumettık qorǧau ministrı Mädina Äbılqasymova qyzmetten ketsın degen talap ta aityldy. 6 aqpanda Astananyŋ ortalyǧyndaǧy konsert zalyna jinalǧan ondaǧan ana bes balasy örtten mert bolǧan otbasyndaǧydai jaǧdai öz bastaryna da baryn aityp, bilıkten äleumettık problemalaryn şeşudı talap ettı. Almaty, Aqtöbe men Şymkentte de tūrǧyndar bilıkke osyndai talappen bardy.
Särsenbı künı Qazaqstan ükımetı el azamattarynyŋ tabysyn arttyru jäne tūrmys sapasyn jaqsartu, köpbalaly otbasylarǧa qoldau şaralaryn küşeitu jönındegı jūmys toby qūrylǧanyn habarlady. İndustriia jäne infraqūrylymdyq damu ministrı Jeŋıs Qasymbek üiı joq köp balaly otbasylarǧa päter saluǧa qarjy ızdestırılıp jatqanyn aitty.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz